Petropavlda ystyq sý qubyry jarylyp, 25 adam baspanasyz qala jazdady
PETROPAVL. KAZINFORM — Petropavldaǵy Jumysshy kentinde eki qabatty turǵyn úıde ystyq sý qubyry jarylyp, saldarynan apatty jaǵdaı týyndady.
Soltúsik Qazaqstan oblystyq Tótenshe jaǵdaılar departamenti baspasóz qyzmetiniń málimetinshe, oqıǵa Ýkraın kóshesinde ornalasqan eki qabatty turǵyn úıde bolǵan.
Páterlerdiń birinde ystyq sý qubyry jarylǵan. Sanaýly mınýttardyń ishinde ystyq sý jertóle astyndaǵy keńistikke jaıyla bastaǵan. Saldarynan segiz páterdi sý basý qaýpi tóngen. Bul páterlerde barlyǵy 25 adam turady. Aǵashtan salynǵan nysan qaınaǵan sýdyń áserinen qatty zaqymdanýy múmkin bolǵan.
Oqıǵa ornyna jedel jetken qutqarýshylar apat saldaryn joıý jumystaryna birden kiristi. Arnaıy jabdyq — motopompa kómegimen jertólege tolǵan sý sorylyp shyǵaryldy. Mamandar úılesimdi ári shuǵyl áreket etip, nátıjesinde sýdyń jaıylýyna jol bermeı, turǵyndardyń múlkine keletin shyǵyn barynsha azaıtyldy. Oqıǵa barysynda eshkim zardap shekken joq.
Buǵan deıin Petropavlda óndiristik tsehte shyqqan órt robottyń kómegimen sóndirilgenin jazǵan edik.