Petropavlda «Іskerlik baılanystar» jobasy aıasynda kásipkerler bilimderin shyńdaýda
PETROPAVL. QazAqparat - Petropavlda «Bıznestiń jol kartasy - 2020» baǵdarlamasynyń aıasynda «Іskerlik baılanystar» atty joba júzege asyrylyp, jergilikti kásipkerler oqý kýrstarynan ótip jatyr, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń habarlaýynsha, «Іskerlik baılanystar» jobasy óńirde ekinshi jyl iske asyrylýda. Birneshe kezeńnen turatyn jobanyń óńirlik kezeńinde kásipkerler úshin trenıngter men semınarlar ótedi. Olar úsh apta boıy qazaqstandyq jáne sheteldik bıznes-trenerlerden dáris alyp, bıznes-jospar quryp, keıin Germanııada bilimderin jetildire alady.
«Іskerlik baılanystar» jobasy ekonomıkanyń basym baǵyttarynda júrgen shaǵyn jáne orta bıznes ókilderine arnalǵan. Taǵy bir talap, olardyń memlekettik tirkeýi úsh jyldan kem emes, jyldyq ortasha tabysy 6000 AEK shamasynda bolýy shart.
«Kýrs barysynda biz kásipkerlerdi bıznesti tıimdi basqarýǵa, alǵa durys maqsat qoıýǵa jáne oǵan durys jetý joldaryna úıretemiz. Olar ózderin memlekettik ekonomıkanyń bir bólshegi retinde qabyldap, búkil álem qoldanyp júrgen jańa ádis-tásilderdi, áleýmettik jelilerdi, bıznesti tsıfrlandyrýdy meńgeredi», - deıdi Germanııadan arnaıy kelgen bıznes-trener Irına Fenske. 
Al jobanyń ekinshi kezeńine sanaýlylar ǵana alynady. Olar ózderiniń bıznes-jobalaryn qorǵap, onyń ómirsheńdigin, tıimdiligin dáleldeýi kerek. Kózge túse bilgender bir aıǵa Germanııaǵa bıznes tájirıbeden ótýge joldama alady. Shet elde olar tájirıbe almasyp qana qoımaı, paıdaly áriptestik baılanystar ornatýǵa múmkindik alady.
«Oblysta ekinshi jyl ótip jatyr. Kásipkerler palatasy jobanyń birinshi kezeńi Petropavlda ótýine qol jetkizdi. Byltyr 30 adamdy oqyttyq. «Eko Pak» kompanııasynyń jetekshisi Germanııaǵa baryp, tájirıbe jınap, kásibin damytý úshin ınvestıtsııa tarta bildi», - deıdi SQO Kásipkerler palatasy dırektorynyń orynbasary Marat Isqakov.
Marat Isqakovtiń aıtýynsha, qazir ekologııalyq orama shyǵaratyn bul fırma nemis kompanııalarymen eki jaqty tıimdi áriptestik ornatý jaıynda kelissózder júrgizip jatyr. «Іskerlik baılanystar» jobasyna kásipkerler tegin qatysa alady.
