Petropavlda ınternet tartpaq bolǵan jumysshy bıikten qulap, kóz jumdy

PETROPAVL. KAZINFORM — Petropavlda montaj jumystary barysynda kótergish platformadan eki adam qulap ketti.

Soltústik Qazaqstan oblystyq polıtsııa departamenti baspasóz qyzmetiniń málimetinshe, oqıǵa búgin bolǵan. Jumysshylardyń biri — 35 jastaǵy er adam — alǵan jaraqattarynan sol jerde kóz jumdy, al 1994 jyly týǵan ekinshi jumysshy aýrýhanaǵa jetkizildi.

— Osy fakti boıynsha eńbek qaýipsizdigi talaptarynyń buzylýy belgilerimen sotqa deıingi tergep-tekserý bastaldy. Іstiń barlyq mán-jaıyn tolyq anyqtaý maqsatynda qajetti tergeý áreketteri júrgizilip jatyr. Tekserý qorytyndysy boıynsha túpkilikti protsessýaldyq sheshim qabyldanady, — delingen baspasóz habarlamasynda.

SQO densaýlyq saqtaý basqarmasynyń baspasóz qyzmetiniń málimetinshe, joǵarydan qulaǵan ekinshi adam emdeý mekemesine jatqyzylǵan joq, ol ambýlatorlyq em alady.

31 jastaǵy er adam keýdesinen soqqy alǵan, qabaq tusy jyrtylyp, sol qoly jyrylǵan.

Eki jumysshy ınternet tartpaq bolǵan eken. 

«Qazaqtelekom» AQ 2025 jylǵy 5 jeltoqsanda Petropavl qalasynda bolǵan oqıǵaǵa qatysty kompanııada ishki tekserý júrgizilip jatqanyn habarlady.

— Qazir oqıǵa boıynsha quqyq qorǵaý organdary sotqa deıingi tergeý júrgizip jatyr, tergeý múddesi úshin istiń mán-jaıy týraly málimetter jarııa etilmeıdi. 
Joǵaryda atalǵan is-sharalar aıaqtalǵan soń kompanııa resmı málimdeme jasaıdy, — dedi kompanııa ókili.

Buǵan deıin Mańǵystaýda qurylysshy altynshy qabattan qulap, mert bolǵanyn jazǵan edik.