Petropavlda ınternet-alaıaqtar boıjetkenniń 1,3 mln teńgesin jymqyrdy
PETROPAVL. QazAqparat – Petropavlda 25 jastaǵy boıjetken ınternet-alaıaqtarǵa jem bolyp, depozıt shotynda jatqan 1 mln 300 myń teńgesinen aıryldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl turǵyny OLX arqyly jatyn bólmege arnalǵan jıhazdy satpaq bolady. Onyń habarlandyrýy boıynsha bir áıel WhatsApp arqyly habarlasyp, tólem jasaý úshin kartasynyń nómirin suraǵan. Birazdan keıin ol kartaǵa aqsha jiberilmeı jatqandyǵyn aıtyp, basqasyn berýdi suraǵan.
Áıel qurbysynan kómek surap, «satyp alýshy» aqsha aýdarýy úshin kartochkasynyń nómirin berýdi ótinedi. 25 jastaǵy boıjetken onyń ótinishin jerge tastamaıdy.
«Birazdan soń «satyp alýshy» jábirlenýshimen baılanysqa shyǵyp, kartanyń derektemelerin, tegi, aty, ákesiniń aty, JSN suraıdy jáne biraz ýaqyttan keıin onyń telefonyna nómir jazylǵan SMS-habarlama keletinin jáne de oǵan osy nómirlerdi aıtýdy suraıdy. Keıin depozıtten 1 mln 300 myń teńge kóleminde qarajat joǵalǵany anyqtaldy. Al jıhazdy satýshynyń kartochkasynda qarajat bolmaǵan, sol sebepti alaıaqtar basqasyn berýdi suraǵan», - deıdi Krımınaldyq polıtsııa basqarmasynyń bastyǵy Petr Klımov.
Alaıaq «jeke tulǵalarǵa arnalǵan ınternet-bankıng» jáne «SMS-parolderdi jetkizý» qyzmetterin paıdalanyp, jábirlenýshiniń bank shotynan basqa shottarǵa aqsha aýdarǵan. Aqsha joǵalǵannan keıin, qyz aldanǵanyn túsinip, polıtsııaǵa júgingen.
Jyl basynan SQO-da 375 ınternet-alaıaqtyq faktisi tirkeldi. Polıtseıler profılaktıkalyq jumystardy, onyń ishinde kúdik týǵyzatyn habarlandyrýlarǵa monıtorıng júrgizip turady. Jyl basynan tanymal ınternet-resýrstarda 100-den asa habarlandyrý buǵattaldy.
