Petropavlda ınklıýzıvti sport ortalyǵynyń qurylysy toqtady: alańnan adam súıekteri shyǵyp jatyr
PETROPAVL. KAZINFORM — Qurylysy bastalǵan sport nysanynyń ornynda buryn eski zırat bolǵandyǵy anyqtaldy.
Qurylysqa jaqyn mańdaǵy shirkeý qyzmetkeri Antonıı Shývakınniń aıtýynsha, qala turǵyndary qyrkúıek aıynyń basynan ǵıbadathanaǵa adam súıekteriniń bólshekterin ákelip tapsyra bastaǵan. Keıin ózderi baryp qurylys aýmaǵyn kórgende, jerleý oryndaryn jáne tabyt synyqtaryn tapqan.
— Qurylys jumystary 11 qyrkúıekten bastap toqtatyldy. Óıtkeni adam súıekteri óte kóp tabylyp jatyr. Keıbiriniń qańqasy tutas saqtalǵan. Olardyń arasynda balalardyń da súıekteri bar. Keıbir jerlerden aǵash tabyttardyń taqtaılary, shegeler, krest jáne basqa da buıymdar shyqty, — deıdi Antonıı Shývakın.
Qurylys barysynda jerdiń joǵarǵy qabatynda jatqan súıekter arnaıy tehnıkanyń áserinen topyraq betine shyǵyp qalǵan. Qazir eriktiler olardy jınap, quqyq qorǵaý organdaryna tapsyryp jatyr.
Aýmaqtan ár kezeńge tıesili bolýy múmkin túrli zattar da tabylǵan. Olardyń arasynda túıme, monetalar bar. Máselen, bir qabirden 1924 jylǵy bes tıyn shyqqan.
Bir ǵasyrdan astam ýaqyt buryn bul jerde hrıstıandardyń zıraty bolǵan. Qalada qurylys qarqyn alǵandyqtan ony jabýǵa týra kelip, ústinen ǵımarattar turǵyzylǵan. Qazirgi qurylys alańynda da jas natýralısterdiń stantsııasy ornalasqan eken.
Petropavl qalasy ákimdiginiń málimetinshe, ınklıýzıvti sport ortalyǵy oblystyq qurylys basqarmasynyń tapsyrysy boıynsha salynyp jatyr. Ortalyq qalanyń aýmaǵynda ornalasqandyqtan, adam súıekteri tabylǵan jaǵdaıda olardy qaıta jerleý jumystarymen Petropavl qalasynyń turǵyn úı-kommýnaldyq sharýashylyǵy jáne avtomobıl joldary bólimi aınalysady.
— Qoldanystaǵy tártipke sáıkes, merdiger qurylys kezinde adam súıekterin tapqan jaǵdaıda bul týraly polıtsııaǵa habarlaıdy. Odan keıin polıtsııa tıisti rásimderdi júrgizedi. 21 qyrkúıekte polıtsııa tabylǵan súıekterdi qaıta jerleýge qaýly shyǵaryp, ruqsat berdi. Endi qalalyq turǵyn úı-kommýnaldyq sharýashylyǵy bólimine qarasty merdiger adam súıekterin alyp, qaıta jerleý jumystaryn júrgizedi, — deıdi qala ákiminiń baspasóz hatshysy Tımýr Jumanov.
Adam súıekteri Jumysshy kentindegi qalalyq zıratqa jerlenbek.
Polıtsııa da tıisti jumystardy qolǵa aldy.
— Qurylys barysynda adam súıekteriniń tabylǵany týraly aqparat tústi. Oqıǵa ornyna jedel-tergeý toby barǵan kezde bul aýmaqta jerleý oryndarynyń bar ekeni anyqtaldy. Súıek qaldyqtary aǵash tabyttardyń ishinen tabylǵan.
Sonymen qatar, osy aýmaqtaǵy zıratqa qyzmet kórsetý úshin jaqyn mańdaǵy shirkeýdiń salynǵany anyqtaldy. Zırattyń naqty shekarasyn belgileý úshin memlekettik arhıvke tıisti suraý joldandy.
Eriktiler qazyp alǵan adam súıekteri shirkeýge jınalyp jatyr. Shirkeý talaptaryna sáıkes olarǵa dinı rásim jasalyp, keıin bul súıekterdi qaıta jerleý týraly qaýly shyǵaryldy, — deıdi Petropavl qalalyq polıtsııa basqarmasynyń tergeý bóliminiń bastyǵy Raýfat Qalaý.
Buǵan deıin SQO-da qum karerinen eki adamnyń jáne muz dáýirindegi múıiztumsyqtyń súıekteri tabylǵanyn jazǵan edik.
