Petropavlda ıesiz jatqan saıajaı ýchaskeleri tegin úlestirilýde
Oblys ortalyǵynda qazirgi tańda 47 300 saıajaı ýchaskesi bar. Olar shamamen 3 myńǵa jýyq gektardy alyp jatyr. Alaıda osy jerlerdiń tek jartysynan astamy ǵana paıdaǵa jaratylǵan. ıAǵnı saıajaı ýchaskeleriniń 24 myńyna ǵana kókónis, jemis-jıdek egiledi.
Baǵbanshylar qoǵamdastyǵynyń tóraǵasy Vıktor Malınkonyń aıtýynsha, qazir Petropavl qalasynda 136 baý-baqsha seriktestigi bar. Saıajaı maýsymy bastalmas buryn 13 baǵyt boıynsha avtobýs júretin joldar qalypqa keltirildi. Bıyl 3 baý-baqsha seriktestigine elektr symdary tartylady.
«Jobalyq-smetalyq qujattar ázir. «Drýjba», «Rodnıchok» jáne «Energetık -2» saıajaı seriktestikterine qalalyq ákimdiktiń kómegimen shamamen 33 mln teńgege jaryq tartylady. Sý máselesin bıyl qozǵaǵan joqpyz», - deıdi Vıktor Malınko.
Petropavl qalasy ákimdiginiń Jer qatynastary bóliminiń resmı málimetinshe, saıajaı ýchaskeleriniń paıdalanylmaýyna ıeleriniń el aýmaǵynan kóship ketýi, qaıtys bolýy nemese kóktemde sý basýy sebep. Mamandar bos jatqan jerlerdi anyqtap esepke alady, keıin sot arqyly ony ıesiz dep tanıdy.
Al ıesiz dep tanylǵan saıajaı ýchaskesin tegin alýǵa múmkindik bar.
«Baǵbandyqpen aınalysqysy kelgen qala turǵyndary ózdiginen baý-baqsha seriktestigin tańdap, onyń tóraǵasymen bos jatqan jerdi anyqtaıdy. Tóraǵa saıajaı ýchaskesiniń mekenjaıy jazylǵan qoldaýhat beredi. Anyqtamany jáne jerdi ıesiz dep tanyp, tirkeýge alý týraly ótinishti qalalyq ákimdikke ákelip tapsyrý qajet. Tek bir jyldan keıin jergilikti atqarýshy organ jerdi ıesiz dep tanyp, kommýnaldyq menshikke ótkizý jaıyndaǵy ótinishpen isti sotqa beredi», - deıdi Jer qatynastary bóliminiń basshysy Erkin Jomart.
Byltyr Petropavl qalasynda 219 jer ýchaskesi qalalyqtarǵa úlestirilse, bıyl jyl basynan 61 adam saıajaı alyp, baǵbanshylar qataryna qosyldy.
