Petropavlda ıesiz ıt-mysyqtarǵa arnalǵan keshen paıda boldy
PETROPAVL. QazAqparat – Petropavlda eýrostandart boıynsha salynǵan, qańǵyǵan ıt-mysyqqa arnalǵan alǵashqy baspana ashyldy, dep habarlaıdy QazAqparat tilshisi.
Qańǵyǵan ıt-mysyqqa arnalǵan zamanaýı keshen Petropavl mańynda boı kóterdi. Jobany júzege asyrǵan kásipker, belgili metsenat Andreı Isakov. Onyń sózine qaraǵanda, mundaı mekeme elimizde joq, bul - alǵashqysy. Balalyq shaqtan úı janýarlaryn jaqsy kóretin oǵan ıesiz qalǵan ıt-mysyqqa arnalǵan baspana salý oıy osydan bes jyl buryn kelgen eken. Tájirıbe alý úshin TMD elderin aralap, ondaǵy janýarlarǵa arnalǵan panajaılardy kórgen. Harkovtegi baspana unap, sonyń negizinde bıyl tamyz aıynda qurylysyn bastaıdy. Qazir eýropalyq úlgide salynǵan keshende 150 shaqty ıt pen 50 mysyq bar.
«Bul jerge janýarlar kóp jaǵdaıda ólimshi halde túsedi. Kóliktiń astyna túskenderi, burynǵy ıeleri ashtan óltirý úshin ádeıi baılap, tastap ketkenderi bar. Olardy aldymen jýyndyryp, tamaqtandyramyz. Aýrýlaryn emdep, ekpe salamyz. Eki qabatty keshende ıt-mysyqty ornalastyratyn oryndardan bólek, olardy jattyqtyratyn jáne kelgen qonaqtardy qarsy alatyn zaldar bolady.
Bilikti mamandar bar veterınarlyq klınıka ashylady. Bolashaqta ólgen janýarlardyń ólekselerin órteıtin krematorıı salynady. Qonaqúı ashý josparda bar. Munda demalysqa ketken turǵyndar ıt pen mysyqtaryn ýaqytsha birneshe kúnge qaldyra alady», - deıdi Andreı Isakov.
Keshen 500 ıt pen 300 mysyqqa arnalǵan. Olardyń kútimimen 20 adam aınalysatyn bolady.
