Petropavlda halyqaralyq mańyzy bar joldy sý basýy yqtımal

PETROPAVL. QazAqparat – Petropavlda Esil ózeni sýynyń tasý shegi boljam boıynsha 18-21 sáýir kúnderi ótpek. Mamandardyń aıtýynsha, birneshe joldy sý basady, onyń ishinde halyqaralyq mańyzy bar «Chelıabınsk-Novosibir» avtojoly da bar, dep habarlaıdy QazAqparat tilshisi.

Óńirlik kommýnıkatsııalar qyzmetinde kóktemgi sý tasqynyna baılanysty qazirgi jaǵdaı baıandaldy. «Qazgıdromet» RMK SQO fılıalynyń dırektory Qymbat Merǵalımovanyń aıtýynsha, búgingi tańda sý tasqyny sharyqtaý shegi Ǵ. Músirepov jáne Shal aqyn aýdandarynan ótti. Qazirgi ýaqytta sý tasqyny Esil aýdanynda ótip jatyr.
Petropavlda Esil ózeniniń sý deńgeıi 1050-1070 sm deıin kóteriledi dep boljanǵan. Qala mańynda tasqyn sýdyń sharyqtaý shegi 18-21 sáýir aralyǵynda bolady dep kútilýde.
Mol sý kelgen jaǵdaıda Esil ózeni arnasynan shyǵyp jaıylyp, «Chelıabi-Novosibir» halyqaralyq mańyzy bar avtojoldyń 528 km sý basýy yqtımal. Sondaı-aq 1-Zarechnaıa kóshesi, Zarechnyı kenti, Prıbrejnoe aýylyna baratyn jol sý astynda qalmaq.
Al 13 sáýirde SQO aýmaǵynda kún raıy buzylyp, qar-jańbyr jaýmaq. Sınoptıkterdiń boljamynsha, keı jerlerde ekpini sekýndyna 23 metrge jetetin jel turmaq.
Sáýirdiń úshinshi onkúndiginde ǵana kún jylynyp, termometr baǵany túnde +6+11-ge deıin kóterilse, kúndiz +16+21 gradýsty kórsetpek.