Petropavlda halyqaralyq qoǵamdyq qor perınataldyq ortalyqqa kıim-keshek syılady
Petropavldaǵy «28 ilmek» klýby shala týǵan sábılerge arnap ózderi toqyǵan jyly kıim-keshekti oblystyq perınataldyq ortalyqqa jetkizdi. Jıyntyqqa kókirekshe, bas kıim, shulyq-qolǵap, komforter-oıynshyq jáne jamylǵy kiredi. Bıyl SQO-da segiz aı ishinde 287 sábı ýaqytynan buryn dúnıege kelgen eken.
«Kúni jetpeı týǵan sábılerge jylý kerek. Olar tońǵan jaǵdaıda energııany jetilýge emes, denesin jylytýǵa jumsaıdy. Sol sebepti denelerin únemi jylýda ustaý qajet. Shala týǵan balalar jylýdyń 50% bastary arqyly joǵaltady. Qolǵap pen shulyq jylý saqtap qana qoımaı, denege tıip, massajer retinde de qoldanylady. Sábılerde tynys alý júıesi durys jetilmegendikten talyqsyp, dem almaı qalýy múmkin. Al toqyma jamylǵy denesin jybyrlatyp, ony únemi qozǵalýǵa májbúrleıdi», - deıdi «28 ilmek» klýbynyń úılestirýshisi Ásemgúl Kakpenova.
Petropavldaǵy «28 ilmek» klýbyna 20 adam múshe. Olar 25 pen 53 jastaǵy áıelder, kóbi – dekrettik demalystaǵy analar.
«Klýbqa múshe qyzdarymyzdy, volonterlerdi biz perızattar dep ataımyz. Qajetti jipti qyz-kelinshekter óz qarajattaryna satyp alady. Keıde demeýshiler syılaıdy. Ádette perınataldyq ortalyqtyń dárigerleri habarlasyp, kıim-keshek qajettigin aıtady. Biz toqyǵan buıymdarymyzdy jınap, jýyp, aparyp beremiz. Oblysta kúni jetpeı týatyn balalar sany az. Sol sebepti qatty qıyndyq kórip jatqanymyz joq. Biraq bizdiń qatarymyzǵa qosylamyn deýshilerdi, toqyma jip syılaýǵa daıyn demeýshilerdi qýanyshpen qarsy alamyz», - deıdi klýb úılestirýshisi.
Klýb músheleriniń bas qosatyn arnaıy orny joq. Jalǵa alý qymbat. Jazda jınalyp kıim-keshek toqý úshin olar tabıǵat aıasyna shyqsa, kún sýytysymen dámhanalardy jaǵalaıdy eken. Alaıda toqyma jibin arqalaǵan klýb múshelerin qoǵamdyq oryndarda jaqtyra bermeıdi.
«28 ilmek klýby» qoǵamdyq qory elimizde 2012 jyldan jumys isteıdi. Petropavlda fılıalynyń ashylǵanyna bıyl úshinshi jyl. Jalpy, Qazaqstannyń 15 qalasynda jáne Reseı, Ózbekstan, Qyrǵyzstan, Ázerbaıjan, Ýkraına, Belarýs, Grýzııa, Latvııa jáne Moldova – barlyǵy 10 memlekette jumys isteıdi.
