Petropavlda halyqaralyq talaptarǵa saı muz arenasy salynyp jatyr
PETROPAVL. KAZINFORM — Petropavlda halyqaralyq deńgeıdegi jarystardy ótkizýge múmkindik beretin muz arenasy qurylysy júrip jatyr.
Sport nysany «Bereke» shaǵyn ortalyǵyndaǵy Qızatov kóshesinde ornalasady. Suz arenasynda 400 metrlik konkımen júgirý joly, eki hokkeı korty jáne kerlıng alańdary qarastyrylǵan. Janynan 50 metrlik olımpıadalyq júzý basseıni, jekpe-jek, kórkem gımnastıka, voleıbol, basketbol jáne fıtnes zaldary bar ámbebap sport kesheni boı kóteredi.
— Óńirde halyqaralyq standarttarǵa saı sport jáne áleýmettik nysandar salý baǵytynda aýqymdy jumystar júrgizilip jatyr. Byltyr paıdalanýǵa berilgen ústel tennısi ortalyǵy zamanaýı talaptarǵa tolyq saı keledi. Sonymen qatar, «Qarasaı» stadıony ÝEFA standarttaryna sáıkes qaıta jańǵyrtylǵan, — dedi nysannyń qurylys barysyn kórgen Soltústik Qazaqstan oblysynyń ákimi Ǵaýez Nurmuhambetov.
Óńir basshysynyń aıtýynsha, áleýmettik salada da oń ózgerister bar. «Bereke» shaǵyn aýdanynda jańa oqý jylynda paıdalanýǵa beriletin jaıly mekteptiń qurylysy aıaqtalýǵa jaqyn. Al «Jas Órken» shaǵyn aýdanynda balabaqsha qurylysy qarqyn alǵan. Jumysshy kentinde jol ótkeliniń jáne «Berekedegi» Malaıa kóshesiniń jol qurylysy barysy baqylaýǵa alynǵan. Barlyq merdiger uıymdarǵa jumystardyń sapaly jáne merziminde aıaqtaý talaby qoıyldy.
Buǵan deıin SQO-da byltyr 14 mekteptiń jabylyp, bıyl taǵy jeteýi jumysyn toqtatatynyn jazǵan edik.