Petropavlda Gınnes rekordtar kitabyna engen álemdegi eń uzyn kóshe jańǵyrtylmaq

PETROPAVL. KAZINFORM — Bıyl Petropavldaǵy Qazaqstan Konstıtýtsııasy kóshesin jónge keltirý josparlanǵan.

Qazaqstan Konstıtýtsııasy kóshesin kópshilik Almatynyń Arbatyna teńeıdi. Jyldyń qaı mezgili bolmasyn munda jaıaý serýendegen qaraqurym halyqty kezdestirýge bolady. Endi bul kóshe túbegeıli ózgerip, jańa kelbetke ıe bolmaq.

Petropavl qalasynyń ákimi Serik Muhamedıevtiń aıtýynsha, joba úsh kezeńde júzege asyrylady. 

— Bul kóshe qala turǵyndarynyń súıikti demalys orny, ony álemdegi eń uzyn jaıaý júrginshiler kóshesi dep ataıdy. Joba aıasynda kósheni keńeıtý, jaryqtandyrý, jol tósemesin jańartý josparlanǵan. Sonymen qatar, jańa sáýlet elementteri qosylady. Jasyl jelekke tıispeımiz, — deıdi Petropavl ákimi.

Jobany iske asyrý barysynda kóshe boıynda ornalasqan bıznes nysandary da qamtylmaq. Barlyq saýda oryndary, keńseler bir sáýlet stılinde bezendiriledi.

— Joba aıasynda bıznes ókilderi ǵımarattarynyń qasbetterin óz esebinen belgilengen talaptarǵa sáıkes retke keltirýge mindetti bolady. Qoǵamdyq tamaqtandyrý oryndary kóshede qyzmet kórsetý aımaqtaryn uıymdastyrýǵa múmkindik alady, — deıdi Serik Muhamedıev.

Buǵan deıin Petropavlda muz saraıy men trıatlon park salynatyndyǵyn jazdyq.