Petropavlda ǵımarat ishinde turǵan eki kólik janyp ketti
PETROPAVL. QazAqparat – Petropavlda ǵımarat ishinde turǵan eki kólikten órt shyǵyp, jarylystyń aldyn alý úshin 5 tehnıka men 20 órt sóndirýshini jumyldyrýǵa týra keldi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqıǵa búgin, kúndizgi saǵat 11.30 kezinde bolǵan. «101» telefon nómirine Petropavl qalasynyń Ǵ.Músirepov kóshesindegi 38B mekenjaıynda ornalasqan bir qabatty ǵımaratta órt shyqqandyǵy týraly habar túsken. Avtokólik angarynda avtobólshekteý qyzmeti kórsetilgen.
Mamandar oqıǵa ornyna jetkende ǵımarat kók tútinge oranyp úlgergen. Іshindegi eki kólikten shyqqan órt shatyrǵa aýysqan. Tilsiz jaýdy aýyzdyqtaý úshin 5 arnaıy tehnıka men 20 órt sóndirýshi jumyldyryldy. Nátıjesinde mamandar jarty saǵattyń ishinde órtti oqshaýlady. Al saǵat 12.41-de tolyǵymen sóndirdi.
«Avtokólikterdiń jarylý qaýpi boldy. Ottek ballondarynan gaz-aýa qospasy shyqty. Órtti sóndirý barysynda ǵımarattan 2 ottegi ballony, 1 gaz ballony jáne 10 kanıstr – 20 lıtr jaǵarmaı shyǵaryldy. Avtobólshekter, maı men shına saqtalǵan qoımany aman alyp qaldyq», - deıdi órt sóndirýshiler.
Alaıda 2 avtokólik pen jıhaz tolyq janyp ketti. Odan basqa shınamontajdaý jumystaryna qoldanylatyn qondyrǵylarǵa, 1 kvadrotsıklge, ǵımarattyń qabyrǵalary men shatyryna zaqym keldi.
Qaza tapqandar men zardap shekkender joq. Órttiń shyǵý sebebi men kelgen shyǵyn mólsheri anyqtalyp jatyr.
