Petropavlda Ǵazız Baıtasovqa arnalǵan memorıaldyq taqta ashyldy
PETROPAVL. QazAqparat - Petropavl qalasynyń Polıtsııa basqarmasynda 2011 jyly Taraz qalasynda lańkesti ustaý kezinde erlikpen qaza tapqan polıtsııa kapıtany Ǵazız Baıtasovqa arnalǵan eskertkish taqta ashyldy, dep habarlaıdy QazAqparat.
2011 jylǵy 11 qarasha. Bul kúni patrýldik polıtsııa batalonynyń qyzmetkeri Ǵazız Baıtasov qalypty rejımde qyzmet atqarǵan edi, bul onyń qaıǵyly oqıǵa aldyndaǵy sońǵy jumys kúni ekenin eshkim bilmedi. Senbi, 12 qarashada muzdaı qarýlanǵan lańkes Taraz qalasynda asa aýyr qylmystardy jasap, jeti adamnyń ómirin qıǵan, onyń beseýi – quqyq qorǵaý organdarynyń qyzmetkerleri.
Lańkes qol granatasyn jarýǵa áreket etken kezde Ǵazız Baıtasov halyqty qaýipten aman alyp qalý úshin qylmyskerdi jerge qulatyp, óz denesimen granatany jaýyp qaldy. Erlikpen qaza tapqan tártip saqshysyna «Halyq Qaharmany» ataǵy berildi.
Búgin óńirdegi eń iri polıtsııa bólinisi – Petropavl qalalyq Polıtsııa basqarmasynyń ǵımaratynda onyń esimi jazylǵan eskertkish taqta ashyldy. Ashylý rásimine oblystyq Polıtsııa departamenti jáne qalalyq Polıtsııa basqarmasynyń basshylyǵy, PB jeke quramy, vedomstvo ardagerleri, oblystyq jáne qalalyq memlekettik organdardyń basshylary, jurtshylyq ókilderi qatysty.
Qala ákimi Rýslan Ańbaev polıtsııa qyzmetkerlerine árdaıym úılerine aman-esen oralýdy tiledi.
Oblys prokýrory Baǵban Taımbetov 12 qarasha kúni bolǵan oqıǵanyń kýási bolǵanyn aıtty.
SQO Polıtsııa departamentiniń bastyǵy Aıdyn Qabduldınovtyń aıtýynsha, Ǵazız Baıtasovtyń erligi batyrlyq pen Otanǵa adal qyzmet etýdiń úlgisi retinde Qazaqstan polıtseıleriniń esinde máńgi saqtalmaq.
Qonaqtar, aqsaqaldar men polıtsııa qyzmetkerleri bir mınýt únsizdikpen eske alyp, eskertkish taqtanyń astyna gúl shoqtaryn qoıdy. Ardagerler taqtany ashqan polıtsııa basshylyǵyna alǵystaryn bildirip, ótkensiz bolashaq joq ekenin atap ketti.
Saltanatty is-sharadan soń tártip saqshylary qyzmetterin jalǵastyrdy.
