Petropavlda gazgolder jarylyp, úsh adam aýrýhanaǵa tústi
PETROPAVL. QazAqparat - Petropavlda gazdy toltyrý barysynda gazgolder jaryldy.
Saldarynan úsh jumysshy zardap shekti, dep habarlady «QazAqparat» HAA tilshisi.
SQO TJD baspasóz qyzmetinen málim etkendeı, saǵat 16.11-de Borkı kentiniń Zelenaıa kóshesinde gazgolderdiń jarylǵandyǵy týraly habar kelip tústi. Qutqarýshylar oqıǵa ornyna 7 mınýtta jetti. Gazgolder 1 sharshy metr aýmaqta laýlap janyp jatty.
«Órt saǵat 16.54-te aýyzdyqtalyp, 17.06-da tolyǵymen joıyldy. Jalynnyń turǵyn úıge jáne jaqyn mańda ornalasqan ormanǵa jaıylýyna jol berilmedi», - dep habarlady SQO TJD baspasóz qyzmetiniń bas mamany Evgenıı Jýravlev.
Jalynmen kúreske Petropavldyń eki órt sóndirý bóliminiń 5 tehnıkasy men jeke quramynyń 22 adamy jumyldyryldy.
Zardap shekken gaz kompanııasynyń jumysshylary 2-3-inshi dárejedegi kúıik jaraqattarymen 3-qalalyq aýrýhananyń jansaqtaý jáne bet-jaqsúıek bólimderine jetkizildi.
