Petropavlda gaz jarylǵan úıden er adamnyń denesi tabyldy
PETROPAVL. QazAqparat – Petropavlda turǵyn úı órtenip, saldarynan gaz ballony jaryldy. Mamandar oqıǵa ornynan 60 jastaǵy er adamnyń múrdesin tapty, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, órt 21 sáýir kúni saǵat 21.00 shamasynda Petropavldaǵy Kosogor, 33 mekenjaıyndaǵy jer úıden shyqqan. Oqıǵa ornyna órt sóndirýshiler kelgen kezde jalyn búkil úıdi jaılap alǵan. Mamandar kelgenshe gaz ballony jarylǵan.
Órtten baspana, monsha janyp ketti, qasyndaǵy kórshi saıajaı úıiniń qabyrǵalary men shatyry zaqymdandy. Al janǵan úıden 1962 jylǵy er adamnyń denesi tabyldy.
Máıit medıtsınalyq saraptamaǵa jiberildi, órttiń shyǵý sebebi men shyǵyn mólsheri anyqtalyp jatyr.
