Petropavlda gaz tarıfi qymbattaýy múmkin
PETROPAVL. QazAqparat – Petropavldy gazben qamtyp otyrǵan «Gorgaz-servıs» JShS tarıfti qymbattatýdy josparlap otyr, dep habarlaıdy QazAqparat tilshisi.
Petropavldy kógildir otynmen qamtyp otyrǵan «Gorgaz-servıs» JShS-i qoǵamdyq tyńdalym ótkizip, kelýshilerdiń nazaryna jańa tarıftiń jobasyn usyndy. Qazir gazdyń tekshe metri 522 teńge tursa, monopolıster ony 615 teńgege deıin qymbattatpaq.
Seriktestik dırektorynyń aıtýynsha, olar bul qadamǵa amalsyzdan barmaq. Gaz óndiretin zaýyttar byltyr óz ónimderin 38 %-ǵa qymbattatyp jibergen. Kólik shyǵyndary da 10 %-ǵa artqan. Tarıfti kóterý arqyly kásiporyn birneshe túıtkildi máseleni sheshýdi josparlaǵan.
«Kommýnaldyq qyzmetter – elektr energııasy men sý tarıfteriniń ósýi de kásiporyn shyǵyndaryn kóbeıtip jiberdi. Sol sebepti gaz qunyn ósirýge májbúrmiz. Óıtpegen, jaǵdaıda shyǵynǵa batamyz. Jóndeý jumystaryn júrgizýdi de josparlap otyrmyz. Qazir mekeme qyzmetkerleriniń ortasha eńbekaqysy 132 myń teńgeni quraıdy. Bul az, bilikti kadrlardy ustap qalý úshin aılyqty keminde 145 myń teńgege arttyrý qajet», - deıdi «Gorgaz-servıs» JShS dırektory Oleg Ivanov.
«Gorgaz servıs» JShS usynys-tilegi qaralyp, keıin naqty baǵany Tabıǵı monopolııalardy retteý jáne básekelestikti qorǵaý komıtetiniń SQO boıynsha departamenti bekitedi.
Jalpy SQO-da sońǵy ret gaz 2018 jyly qańtarda qymbattaǵan edi. Ol joly kógildir otynnyń baǵasy 6,62 %-ǵa, ıaǵnı bir tekshe metri 489-dan 522 teńgege ósti.
