Petropavlda fýtbol akademııasynyń qurylysy bastalmaq
PETROPAVL. KAZINFORM — Petropavldaǵy «Qarasaı» stadıony 2,5 jyl jóndeýden keıin qaıta ashylyp, paıdalanýǵa berildi.
Sporttyq nysandy jóndeýge 1,3 mlrd teńge jumsaldy. Merdiger kompanııa qurylys materıaldaryn Germanııa men Italııadan tapsyryspen jetkizdi.
Endi Petropavldyń basty sporttyq arenasy Premer-lıganyń oıyndaryn qabyldaýǵa daıyn. Jańartylǵan stadıon eýrokýbok matchtaryn ótkizýge múmkindik bermek.
— Stadıonda endi jasandy alań, jylytý jáne avtomatty sýarý júıesi, jaryqtandyrý, elektrondy tablo, jaıly trıbýnalar men oryndyqtar bar. Sektorlar ústine jaýynnan qorǵaıtyn shatyr ornatylyp, komandalardyń alańǵa shyǵýy úshin ortalyqtan arnaıy shyǵý joly jasaldy. Oıynshylar, tóreshiler, qonaq komanda men BAQ úshin trıbýna astyndaǵy bólmeler standartqa saı jabdyqtaldy. Barlyq ózgeris fýtbolshylar men jankúıerler úshin barynsha qolaıly jaǵdaı jasaýǵa baǵyttalǵan. Jaqynda 15 gektar aýmaqta fýtbol akademııasyn salý josparlanyp otyr. Onyń quramynda 5 myń kórermenge arnalǵan jabyq manej bolady, — dedi Soltústik Qazaqstan oblysynyń ákimi Ǵaýez Nurmuhambetov áleýmettik paraqshasynda.
Jańartylǵan stadıonda alǵashqy oıyn búgin saǵat 15.00-de ótedi. «Qyzyljar» fýtbol klýby «Ulytaý» klýbymen oınaıdy. Rekonstrýktsııadan keıingi alǵashqy matchqa kirý tegin bolmaq.
Buǵan deıin Aqtóbede 35 myń oryndyq stadıon salynatyndyǵyn jazǵan edik.