Petropavlda eýrostandartpen jol belgisi salynyp jatyr
PETROPAVL. QazAqparat – Petropavldaǵy kóshelerdiń birinde eksperımenttik jol belgisi – sary jolaqtar paıda boldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldaǵy eksperımenttik jolaq Sátpaev kóshesindegi jolda paıda boldy. 1100 metrlik sary jol belgisi júrgizýshilerdiń nazaryn birden aýdarady.
«Eksperıment jol qozǵalysy qaýipsizdigin arttyrýǵa baǵyttalǵan. Nátıjesi boıynsha QR zańnamalyq aktilerine, sondaı-aq Jolda júrý erejelerine de tıisti ózgerister engizý josparlanǵan. Jol-kólik ınfraqurylymyn jaqsartý - ákimshilik polıtsııa mindetteriniń biri», - deıdi SQO PD ákimshilik polıtsııa basqarmasy bastyǵynyń mindetin atqarýshy Nazar Baımatov.
Petropavl qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń baspasóz hatshysy Ásem Aıtýlovanyń aıtýynsha, jol belgisi 4 jylǵa jetedi. Jolaqy salyǵa termoplastık qoldanylǵan. Jalpy bıyl Petropavldyń 15-ke jýyq kóshesinde jol belgileri jańartylmaqshy.
«Termoplastık - untaq túrindegi syr. Kópke jetedi, óshirilip qala bermeıdi. Sapasynan bólek, salynǵan jol belgileri men tańbalar túnde de jarqyrap turady. Ony salý úshin kún shyǵyp turýy kerek, sol sebepti jumystar saǵat 12.00-13.00 aralyǵynda atqarylady. Sary túspen boıaý ázirge qanat qaqty joba, eýropalyq standarttarǵa saı salynyp jatyr. Nátıjesinde jol belgileri qysta da júrgizýshilerge kórinedi», - deıdi Ásem Aıtýlova.
