Petropavlda estý qabileti nashar balalar arasynda fýtboldan jarys bastaldy
PETROPAVL. QazAqparat - Petropavldaǵy A.Vınokýrov atyndaǵy sport saraıynda shaǵyn fýtboldan QR chempıonaty bastaldy, dep habarlaıdy QazAqparat tilshisi.
Respýblıkalyq chempıonat estý qabileti nashar balalar arasynda ótip jatyr. Bıyl alań ıelerimen birge 8 komanda jarysqa qatysýǵa nıet bildirdi. Olar: Almaty, Aqtóbe, Atyraý jáne Batys Qazaqstan oblystary jáne Astana men Almaty, Shymkent qalalarynyń quramalary.
«Respýblıkalyq chempıonat úshinshi jyl qatarynan Petropavl qalasynda ótip jatyr. Bizdiń sportshylarymyz byltyr jaqsy nátıje kórsetti. Eki jyl boıy kúmis júlde aldyq. Bıyl da jeńis tuǵyrynan kórinemiz degen úmittemiz. Federatsııa sportshylarǵa fýtbolmen aınalysý úshin árqashan jaǵdaı jasaıdy, qarjymen kómektesedi», - deıdi SQO múgedekter federatsııasynyń vıtse-prezıdenti Baýyrjan Quljanov.
Jarys alańyna birinshi bolyp Shymkent pen Almaty qalalarynyń sportshylary shyqty. Qos qurama byltyr aqtyq oıynda kezdesip, shymkenttikter jeńiske jetti. Bıyl da olardyń baby kelisip, qarsylastaryn 4:1 esebimen oısyrata jeńdi.
«Balalar chempıonatqa úlken daıyndyqpen keldi. Kúnine 2 ret jattyǵý jasady. Qarsylastarymyzdy jaqsy bilemiz. Sonyń da kómegi bolǵan shyǵar. Meniń úmitimdi aqtady», - deıdi Shymkent qalasy quramasynyń jattyqtyrýshysy Esenbek Atabaev.
Shaǵyn fýtboldan ótip jatqan respýblıkalyq chempıonat 4 kúnge jalǵasady.
