Petropavlda esirtki jasyryp, taratty degen kúdikpen eki áıel ustaldy
PETROPAVL. KAZINFORM – Petropavlda 700 gramnan astam sıntetıkalyq esirtkimen eki qurby ustaldy. Kúdiktiler tyıym salynǵan zatty arnaıy orynǵa jasyryp, taratýdy kásip etken.
Soltústik Qazaqstan oblysy Polıtsııa departamenti baspasóz qyzmetiniń málimetinshe, esirtki qylmysyna qarsy is-qımyl basqarmasynyń qyzmetkerleri Petropavldaǵy jumysshy kentinde Toyota RAV 4 avtokóligimen júrgen eki áıeldi ustady. Olardyń biri – 33 jastaǵy qala turǵyny. 2022 jyldyń qyrkúıek aıynda áıeldiń kúıeýi esirtki jasyryp, taratqany úshin sottalyp, qazir bas bostandyǵynan aıyrý oryndarynda jazasyn ótep jatyr. Alaıda bul zaıybyna sabaq bolmaǵan.
Kóliktiń ishinde onyń 36 jastaǵy qurbysy bolǵan. Áıelderdi jáne olardyń turǵylyqty mekenjaılaryn tintý kezinde 700 gramnan astam untaq jáne kesektelgen zat tárkilendi.
Saraptama nátıjesi onyń tuz degen ataýmen belgili α-PvP sıntetıkalyq esirtkisi ekenin kórsetti.
«Sondaı-aq esirtkini býyp-túıýge arnalǵan materıaldar tárkilenip alyndy. Atalǵan fakti QR Qylmystyq kodeksiniń 297-babynyń 3-bóligi boıynsha Sotqa deıingi tergep-tekserýlerdiń biryńǵaı tizilimine tirkeldi. Esirtkini asa iri kólemde ótkizý úshin 10 jyldan 15 jylǵa deıingi merzimge bas bostandyǵynan aıyrý jazasy kózdelgenin eske salamyz. Qazirgi ýaqytta 33 jastaǵy qala turǵyny qamaýǵa alyndy, tergeý júrip jatyr. Kelip túsken aqparatqa sáıkes kúdiktiler bul qylmyspen 4 aıǵa jaqyn ýaqyt aınalysqan», – deıdi Esirtki qylmysyna qarsy is-qımyl basqarmasynyń bastyǵy Rýslan Saparov.
