Petropavlda Esil ózeniniń deńgeıi 144 sm kóterildi — Sý qoımalary boıynsha sońǵy derekter

ASTANA. KAZINFORM — Sý resýrstary jáne ırrıgatsııa mınıstrliginiń resmı ókili Móldir Ábdýalıeva elimizdegi sý qoımalaryndaǵy jaǵdaıdy baıandady.

Aqmola oblysyndaǵy eki iri sý qoımasy 99%-ǵa toly. Munda sý tasqynynyń belsendi kezeńi ótip, salalary turaqtandy. Jabaı ózeniniń rettelmeıtin aǵyny artyp jatyr, Atbasarda sý tasqyny bar», — dedi M. Ábdýálıeva respýblıkalyq aqparattyq shtabta ótken brıfıngte.

Onyń aıtýynsha, Astana sý qoımasyna túsetin sý tranzıttik rejımde jiberilip jatyr. Sý qoımasyna aǵynnyń tómendeý úrdisi baıqalady, onda táýlik boıy monıtorıng júrgizilýde.

«Soltústik Qazaqstan oblysynda 2 iri sý qoımasy 100%-ǵa toly, ózen sýynyń arnasynan shyǵýy jalǵasyp jatyr. Osy saǵatta Petropavl qalasy shegindegi Esil ózeniniń deńgeıi — 1038 sm, ol bir táýlikte 144 sm-ge kóterildi. Aımaqta kúrdeli jaǵdaı saqtalýda», — dep tolyqtyrdy spıker.

Aqtóbe oblysynda eki iri sý qoımasynyń ortasha sý jınaý kórsetkishi — 97%. Óńirdegi jaǵdaı turaqty.

Shyǵys Qazaqstan oblysyndaǵy eki iri sý qoımasy 80% sý jınady.

Abaı oblysynda Shúlbi sý qoımasy 97%-ǵa toldy. Aımaqta sý tasqynynyń belsendi kezeńi bastaldy.

Batys Qazaqstan oblysyndaǵy tórt iri sý qoımasy 72%-ǵa toldy. Irakla sý qoımasynan jiberilgen sý Qazaqstan shekarasyna ázirge jetken joq.

Bul sý 16-17 sáýirde keledi dep kútilip otyr. 

Qaraǵandy oblysynda 4 iri sý qoımasy 100% toldy, óńirde sý tasqynynyń qaýipti kezeńi ótti. Jaǵdaı turaqty.

Qostanaı oblysynda eki iri sý qoımasynyń ortasha sý jınaý kórsetkishi — 92%, sý tasqynynyń belsendi kezeńi ótti.

Qaratomar sý qoımasy tranzıttik rejımde jumys istep tur.