Petropavlda Esil ózeniniń jaǵalaýyn nyǵaıtý jumysy bastaldy
PETROPAVL. KAZINFORM – Esil ózeniniń jaǵalaýy sý tasqynynan keıin jáne jaýyn-shashyn saldarynan birshama opyrylyp qulaǵan.
Sol sebepti Jeńis saıabaǵy mańyndaǵy jaǵalaýdyń ári qaraı opyrylýyna jol bermeý jáne sol mańda turatyn turǵyndardyń qaýipsizdigin qamtamasyz etý maqsatynda keshendi joba júzege asyrylyp jatyr.
Petropavl qalalyq ákimdiginiń málimetinshe, jaǵalaýdy bekitý jumystary birneshe kezeńnen turady. Aldymen ózen jaǵasyndaǵy topyraǵy syrǵyp qulaǵan ýchaskeler arnaıy ınjenerlik tehnologııalardyń kómegimen kúsheıtiledi. Bul maqsatta bolat shpýnttar, shvellerler, arnaıy qalqandar men geotor materıaldary paıdalanylyp jatyr. Keıin nyǵaıtylǵan aýmaqtar topyraqpen qaıta toltyrylady.
Jobany júzege asyrýǵa 658 mln teńge bólingen.
- Bul jumys byltyr bastaldy deýge bolady. Joba aıasynda Jeńis saıabaǵynan «Solnechnyı» shıpajaıyna deıin uzyndyǵy 300 metr bolatyn ashyq nóser kárizi salyndy. Sonymen qatar aýmaqta kárizdik sorǵy stantsııasy ornatylyp, jaýyn jáne erigen qar sýlarynyń qaýipsiz aǵýyn qamtamasyz etetin ınjenerlik júıe iske qosyldy.
Qarjylandyrýǵa baılanysty, qarajat túsip jatsa bıyl jumysty aıaqtaý mindeti tur, - deıdi Petropavl qalalyq turǵyn úı-kommýnaldyq sharýashylyǵy bóliminiń baspasóz hatshysy Berdimurat Baımuqan
Buǵan deıin BQO-da Jaıyq ózeniniń jaǵalaýyn bekitý jumystary júrgizilgenin jazǵan edik.
