Petropavlda Esil ózeniniń tasýyna baılanysty eskertý jarııalandy
PETROPAVL. KAZINFORM – Petropavlda Esil ózeniniń sý deńgeıi kóterilip, qaýipti mejege jaqyndap qaldy.
Petropavlda sý tasqynynyń ekinshi tolqyny ótip jatyr.
«Qazgıdromet» kásiporny Soltústik Qazaqstan oblystyq fılıalynyń málimetinshe, ótken bir táýlikte Esil ózeniniń sý deńgeıi 8 sm-ge kóterilip, saǵat 08:00-degi jaǵdaı boıynsha 993 sm-ge jetti. ıAǵnı, qaýipti deńgeı – 1 myń sm-ge jaqyndap qalǵan. Qazirgi ýaqytta Petropavl gıdrotoraby mańyndaǵy Zarechnyı kentine baratyn aınalma avtojoldy sý basty.
Sınoptıkter men gıdrologtardyń boljamynsha, aldaǵy ýaqytta sý deńgeıi áli de kóterilýi múmkin jáne qaýipti mejeden asý qaýpi bar. Eger sý deńgeıi qaýipti shekten asatyn bolsa, ózenniń tómengi aǵysyndaǵy avtojoldardy sý basý qaýpi kúsheıedi. Osyǵan baılanysty turǵyndar men júrgizýshilerge saqtyq sharalaryn qatań saqtaý usynylady.
Buǵan deıin SQO-ǵa sý tasqynymen kúreske kómekke kelgen almatylyq áskerıler úılerine qaıtqanyn jazǵan edik.
