Petropavlda Esil ózeni tasyp jatyr

PETROPAVL. KAZINFORM – Petropavlda Esil ózeniniń sý deńgeıi qaýipti mejege jetip, jaıylǵan sý qala mańyndaǵy aınalma joldyń 27 shaqyrymyn basty. 

«Qazgıdromet» kásiporny Soltústik Qazaqstan oblystyq fılıalynyń málimetinshe, Petropavlǵa sý áli de keledi. Qazir Esil ózenindegi birinshi tolqynnyń shyńy Novonıkolskoe aýylynyń mańynda ótip jatyr. Oblys ortalyǵyna ol 19-20 sáýir kúnderi keledi dep boljanǵan.

– 17 sáýir saǵat 12:00-degi jaǵdaı boıynsha Petropavlda Esil ózeniniń sý deńgeıi 941 sm jetti. Bul – qaýipti meje. Qazirgi ýaqytta Petropavl aınalma jolynyń 27 shaqyrymynda asfaltqa sý jaıyldy, - deıdi fılıal dırektorynyń orynbasary Natalııa Levına.

Sergeev sý qoımasynda 7 sáýirde sý tasqynynyń birinshi tolqyny sharyqtaý shegine jetip, 922 sm bolyp tirkeldi. Bul 2025 jylǵy kórsetkishten 70 sm-ge tómen, byltyr eń joǵary deńgeı 1 062 sm bolǵan. Al bóget qyrynan asý deńgeıi 122 sm-di qurady.

17 sáýir saǵat 12:00-de sý qoımasynyń deńgeı 864 sm boldy, bóget qyrynan asý – 64 sm. Sý tasqynynyń birinshi tolqynynan beri sý deńgeıi 58 sm-ge tómendedi.

Búgingi tańda Ǵ. Músirepov jáne Shal aqyn aýdandarynda ornalasqan gıdrologııalyq beketterde Aqmola oblysyndaǵy Jabaı, Qalqutan, Terisaqqan ózenderinen kele jatqan ekinshi tolqynǵa baılanysty sý deńgeıi qaıta kóterilip jatyr. Sáýirdiń úshinshi onkúndiginiń basynda Sergeev sý qoımasynda tolqynnyń ekinshi shyńy ótedi dep boljanǵan. Petropavl qalasyna ekinshi tolqyn 1 mamyrǵa qaraı jetpek. 

Buǵan deıin Petropavlda sý basýy múmkin saıajaı aýmaqtarynda kezekshilik uıymdastyrylǵanyn jazǵan edik.