Petropavlda eskertkish ústine minip, selfı jasaǵan sheteldik qamaýǵa alyndy
PETROPAVL. KAZINFORM — Petropavlda «Abaı men Pýshkın» eskertkishine minip, sýretke túsken sheteldik bes táýlikke qamaýǵa alyndy.
Oqıǵa 1 qańtar kúni bolǵan. Soltústik Qazaqstan oblystyq polıtsııa departamenti baspasóz qyzmetiniń málimetinshe, Táýelsizdik stellasynyń mańyndaǵy muz qalashyǵynda serýendep júrgen qala turǵyndary jigitterdiń óreskel áreketin baıqaǵan. Jastar jaqyn mańdaǵy «Abaı men Pýshkın» eskertkishine minip sýretke túsken. Beıádep sóılep, qoǵamdyq tártipti buzǵan.
Turǵyndar sol mańda kezekshilikte júrgen polıtsııanyń jaıaý jasaǵyna júginip, jedel basqarý ortalyǵyndaǵy beınebaqylaý ınspektorlarynyń kómegimen quqyq buzýshylardy ustady.
Jigitterge qoǵamdyq orynda mas kúıde bolǵany úshin hattamalar toltyryldy, biraz ýaqyt buryn kórshi elderdiń birinen Petropavlǵa kelgen jastardyń úsheýiniń de Qazaqstan aýmaǵynda bolý merzimi aıaqtalǵany anyqtaldy. Olar bul zań buzýshylyqtary úshin de ákimshilik jaýapkershilikke tartyldy.
Al Petropavldyń ákimshilik quqyq buzýshylyq ister jónindegi mamandandyrylǵan soty eskertkish ústinde selfıge túsken sheteldikti bes táýlikke ákimshilik qamaýǵa alý túrindegi jaýapkershilikke tartty.
Buǵan deıin Petropavlda merekelik demalys kúnderi polıtsııaǵa 1 800-den astam qońyraý túskenin jazǵan edik.