Petropavlda eski úıler súrilip, jańa shaǵynaýdan salynyp jatyr

ASTANA. KAZINFORM – Soltústik Qazaqstan oblysynda jyl sońyna deıin 330 myń sharshy metr turǵyn úı qoldanysqa beriledi. Bul týraly óńir ákimi Ǵaýez Nurmuhambetov aıtyp berdi.

Ákimniń aıtýynsha, eń kóp turǵyn úı Petropavl qalasynda salynyp jatyr. Oblys ortalyǵynda 32 kópqabatty úıdiń qurylysy bastalsa, onyń 20-sy jeke qurylys kompanııalarynyń esebinen salynyp jatyr.

− Qazir «Qopaı» eski shaǵynaýdanyn qaıta qurý jumystary qarqyndy júrip jatyr. Onda apattyq jáne eski úıler buzylyp, ornyna zamanaýı jaıly shaǵynaýdan boı kóterýde. Munda 605 páterge arnalǵan 7 kópqabatty úıdiń qurylysy bastaldy. Bul – kezekte turǵan azamattarǵa arnalǵan nesıege beriletin baspanalar, − dedi Ǵ.Nurmuhambetov Astanada Ortalyq kommýnıkatsııalar qyzmetinde.

Jalpy, bul shaǵyn aýdanda 27 kópqabatty úı salynady. Jańa páterlerge 3,8 myń otbasy qonystanady. Olar úshin qajetti áleýmettik nysandar da boı kóteredi.

«Sonymen qatar, áleýmettik osal toptar úshin turǵyn úıler satyp alynýda. Bul maqsatqa 5,8 mlrd teńge bólindi. Jalpy, jyl sońyna deıin oblys boıynsha 330 myń sharshy metr turǵyn úıdi paıdalanýǵa berý josparlanyp otyr», - dedi SQO ákimi.

Eske sala ketsek, SQO-da 511 mlrd teńgege 34 ınvestıtsııalyq joba iske asyrylyp jatyr. Bul 5 myńnan astam jumys ornyn qurýǵa múmkindik beredi.

Buǵan deıin Soltústik Qazaqstan oblysynyń ákimi kóktemgi sý tasqyny saldary qalaı qalpyna keltirilgenin aıtyp bergen edi.