Petropavlda esirtki jarnamalaıtyn jazbalarmen kúrestiń jańa joly tabyldy
PETROPAVL. QazAqparat - Petropavlda esirtki saıttaryn jarnamalaǵan jazbalarmen kúresý úshin «Street art esirtkige qarsy» aktsııasy bastaldy, dep habarlaıdy QazAqparat tilshisi.
SQO PD baspasóz qyzmetiniń habarlaýynsha, tártip saqshylary Petropavldaǵy úı qabyrǵalarynda esirtki saıttaryn jarnamalaǵan jazbalarmen kúresý úshin turǵyndarǵa tamasha syılyq jasap otyr. Olar strıt art baǵytynda sýret salatyn tanymal sýretshini qajetti quraldarmen qamtamasyz etti. Al sýretshi óz kezeginde usqyny ketken qabyrǵaǵa jan berdi.
Nursultan Nazarbaev kóshesindegi eki kópqabatty úıdi qosyp turǵan arka «Daryn» mektep-lıtseıiniń janynda ornalasqan. Bul jerden kún saıyn júzdegen bala ótedi. Anadaıdan menmundalaǵan esirtki satatyn saıttardyń jarnamasy ádemi gúldermen, kógershinderdiń beınesimen jabyldy.
«Eki kún boıy toqtaýsyz jumys istedim. Esirtki qylmysyna qarsy is-qımyl basqarmasy qoldap, maǵan osyndaı múmkindik berdi. Salǵan sýretim ózime ǵana emes, turǵyndarǵa da unaıdy dep senemin», - deıdi Stanıslav Alert.
«Strıt-art esirtkige qarsy» aktsııasy - polıtseılerdiń, SQO ákimdiginiń Jastar saıasaty máseleleri basqarmasynyń jáne Jastar resýrstyq ortalyǵynyń ortaq bastamasy. Oǵan alǵashqylardyń biri bolyp Petropavldaǵy «Daryn» jáne № 42-shi mekteptiń joǵary synyp oqýshylary qatysty.
Qaýipti jazýlardy turǵyndardyń óz betinshe boıaýǵa múmkindigi bar.
«Sıntetıkalyq esirtkini jarnamalaıtyn saıttardyń graffıtı-jazbalarynyń der kezinde boıalýyn páter ıeleri kooperatıvi, turǵyn úı-kommýnaldyq sharýashylyǵy qyzmeti men tártip saqshylary baqylaýda ustaǵanyna qaramastan, bul bizdiń qala úshin ózekti másele bolyp otyr. «Street art esirtkige qarsy!» jazýyn jazyp, shaǵyn logotıpimizdi beıneledik. Biz barlyq jas daryndardy osy aktsııaǵa qatysýǵa shaqyramyz. Esirtkige «joq» dep, túrli sýrettermen qalamyzdy bezendireıik», - deıdi SQO ІІD Esirtki qylmysyna qarsy is-qımyl basqarmasy bastyǵynyń orynbasary Ivan Terzıdı.
