Petropavlda esirtki taratýmen aınalysqan 25 jastaǵy qyz ustaldy

PETROPAVL. QazAqparat – Petropavlda sıntetıkalyq esirtkini belgili jerge jasyryp, taratýmen aınalysqan 25 jastaǵy boıjetken ustaldy, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavlda 25 jastaǵy qyz esirtki kýreri bolyp, ony taratýmen aınalysqan. Kúdiktini esirtki qylmysyna qarsy is-qımyl basqarmasynyń qyzmetkerleri kópqabatty úıdiń aýlasynda taksı kóliginde kele jatqan jerinde ustady.

Avtokólikte krıstall tárizdi zat salynǵan 40 túıinshek bolǵan, tártip saqshylary tárkilegen zat «tuz» dep atalatyn sıntetıkalyq preparat bolyp shyqty. Jalpy salmaǵy 20 gramdy qurady. Bul – asa iri mólsherge jatady.

Taǵy 0,5 gramm «tuz» salynǵan bir túıinshek boıjetkenniń turǵylyqty mekenjaıynan tárkilendi.

«Tergeý barysynda qyzdyń esirtki taratýmen aınalysatyn ınternet-dúkenderdiń birimen baılanysy anyqtaldy. Sotqa deıingi tergep-tekserý materıaldary Qylmystyq kodekstiń 297-baby 3-bóligi - «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha sotqa jiberildi.

Atalǵan baptyń sanktsııasymen 10 jyldan 15 jylǵa deıingi merzimge bas bostandyǵynan aıyrý túrindegi jaza kózdelgen», – deıdi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.