Petropavlda esirtki saýdalaıtyn saıt jazylǵan graffıtı paıda boldy
PETROPAVL. QazAqparat - Petropavlda polıtseıler úılerdiń syrtynda esirtki saýdalaıtyn saıttardy jazyp jatqan qala turǵynyn ustady, dep habarlaıdy «QazAqparat» HAA tilshisi.
Soltústik Qazaqstan oblystyq polıtsııa departamenti baspasóz qyzmetiniń aqparatynsha, ustalǵan 22 jastaǵy nashaqor kelinshek kópqabatty úılerdiń qabyrǵalarynda sıntetıkalyq psıhobelsendi zattardy taratatyn saıttardyń graffıtı sýretin salǵan.
«Bul týraly áıeldiń áreketine alańdaǵan qala turǵyndary habarlady. Osyndaı jazbalardy dereý polıtsııaǵa habarlap, olardy joıyp jiberý kerek. Kóptegen PIK tóraǵalary bul jumysty júrgizip keledi. Biraq tek qoǵamnyń belsendiligi arqyly ǵana nashaqorlyqtan qorǵana alamyz», - dedi Esirtki bıznesine qarsy kúres basqarmasy bastyǵynyń mindetin atqarýshy Ivan Terzıdı.
«Sıntetıkalyq esirtkini qaýipti tusy ony taratýdyń joldarynyń jeńildigi. Esirtki satýshylar saıttar jasap, «klıentterdi» tartý úshin saıt mekenjaılaryn úılerdiń qabyrǵalaryna jazdyrýǵa esirtkige táýeldilerdi kóndiredi», - delingen habarlamada.
Qazan aıynyń ortasynan bastap óńirlik polıtsııa «Refleks» atty jedel-aldyn alý sharasyn ótkizýde. Onyń basty maqsaty - esirtki zattary men sıntetıkalyq psıhobelsendi zattardyń zańsyz aınalymyn shekteý. Tártip saqshylary mektepter men kolledjderde dárister oqyp, ata-analarmen kezdesý ótkizedi. «Spaıs: tuıyqqa tirelý» atty derekti fılmin kórsetedi.
Jyl basynang beri aımaqta zańsyz aınalymnan 400 keli esirtki, sonyń ishinde 5 keliden astam nasha jáne 1,5 keli sıntetıkalyq esirtki tárkilendi. Polıtsııa sıntetıkalyq esirtkini taratýmen aınalysqan 50-den astam saıtty anyqtap, olardyń jumysyn toqtatty.
