Petropavlda Esildiń tasýynan halyqaralyq mańyzy bar avtojol jabyldy

PETROPAVL. QazAqparat – Petropavlda Esil ózeni tasyp, «Novosibir-Chelıabi» halyqaralyq mańyzy bar avtojoldyń Zarechnyı kenti mańyndaǵy ýchaskesin sý basyp qalýyna baılanysty jol qozǵalysyna tyıym salyndy, dep habarlaıdy QazAqparat tilshisi.

Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, Petropavl mańynda Esil ózeni arnasynan shyǵyp, «Novosibir-Chelıabi» M-51 halyqaralyq mańyzy bar avtojoldyń 525-529 shaqyrym aralyǵyn sý basýyna baılanysty barlyq kólik túrleri úshin qozǵalys toqtatyldy.

«Jeńil kólikter R-49 avtojolynyń 0-8 km arqyly, al úlken gabarıtti júk kólikteri «Peterfeld-Arhangelka-Novokamenka» R-57 avtojoly arqyly nemese «Jezqazǵan-Petropavl» A-16 avtojolynyń 0-30, 519 km, sondaı-aq «Jezqazǵan-Petropavl» A-16 avtojolynyń 938-954 km arqyly aınalyp óte alady.

Shekteý 16 sáýir kúni saǵat 19.00-de engizildi», - delingen baspasóz habarlamasynda.

Mamandardyń aıtýynsha, Zarechnyı kentine jol bar, al onyń aınalasyndaǵy aınalma jol jabyq.

Áleýmettik jelide sý basqan trassanyń vıdeolary tarap jatyr. Avtojúrgizýshilerdiń aıtýynsha, saǵat shamamen 18.00 kezinde jol ústimen aqqan sýdyń bıiktigi 30 sm jetti.

«Qazgıdromet» RMK Soltústik Qazaqstan oblystyq fılıalynyń málimetinshe, Petropavl mańynda Esil ózeniniń sý deńgeıi tańǵy saǵat 8.00 men 16.00 aralyǵynda taǵy 5 sm kóterildi. Osylaısha 983 sm jetti. Qaýipti meje – 1050 sm.

Buǵan deıin búgin tańǵy saǵat 06.15-te Esil ózeniniń tasýyna baılanysty, «Chelıabi-Novosibir» M-51 avtojolynyń 528-inshi shaqyrymyn sý basqanyn jazǵan edik.