Petropavlda Esil sýy qaýipti deńgeıge jaqyndady: Óńirde eskertý jarııalandy
PETROPAVL. QazAqparat – Petropavlda Esil ózeniniń sýy kóterilip, qaýipti deńgeıge jaqyndap qaldy. Tasyǵan sý halyqaralyq mańyzy bar joldyń ústine jaıylýy múmkin, dep habarlaıdy QazAqparat tilshisi.
«Qazgıdromet» RMK Soltústik Qazaqstan oblystyq fılıalynyń málimetinshe, Esil ózeni Petropavl qalasy mańynda kóterilip keledi. Saǵat 16.00-de gıdrologııalyq postta sý deńgeıi 941 sm kórsetti. Qaýipti mejege 19 sm jetpeıdi.
Petropavl mańynda ózen sýy tasyp, arnasynan shyqqan jaǵdaıda halyqaralyq mańyzy bar «Chelıabi-Novosibir» tasjolyn shaıýy yqtımal.
Mamandardyń aıtýynsha, ózen sýynyń deńgeıi áli de kóteriledi. Osyǵan baılanysty óńirde eskertý jarııalandy.
Jalpy ótken táýlikte Petropavl mańynda Esil ózeni 31 sm kóterilgen. Maksımaldy kórsetkish Qyzyljar aýdany Dolmatovo eldi mekeniniń mańynda tirkeldi, munda ózen sýy 69 sm-ge kóterildi. Novonıkolskoe aýylynyń mańynda da sý áli de kóbeıýde, bir táýlikte 45 sm-ge joǵarylaǵan.
