Petropavlda Esil ózeniniń sýy qaýipti deńgeıge jaqyndap keledi
PETROPAVL. QazAqparat - Petropavl aýmaǵynda Esil ózeninde sý qaýipti deńgeıge jetýge 40 santımetrdeı qaldy, dep habarlaıdy QazAqparat tilshisi.
Soltústik Qazaqstan oblysynda kóktemgi sý tasqyny saıabyrlaıtyn emes. Óńirlik «Qazgıdromet» fılıaly mamandarynyń aıtýynsha, Esil ózenindegi sý deńgeıi bir táýlikte 4 sm-ge kóterilip, 1009 sm-ge jetti. Al, sý mólsheriniń qaýipti deńgeıi - 1050 sm.
«Pokrovka eldimekeniniń janynda Esil ózeni bir táýlikte 10 sm-ge, Novonıkolskoe mańynda 25 sm-ge kóterildi. Burynǵysynsha Chelıabınsk-Novosibir avtojolynyń 528-shaqyrymyn jáne Novonıkolskoe kópirin sý basqan. Sergeev gıdrotorabynyń sý deńgeıi 903 sm, mólsheri - 819 mln tekshe metr, bul - qajetti mólsherden 126 mln tekshe metrge artyq. Táýligine 525 tekshe metr sý jiberilip jatyr», - delingen habarlamada.
Sınoptıkterdiń boljamy boıynsha, 30 sáýirde oblysta qar jaýady dep kútilýde. Túnde aýa-raıy 0-5, keı jerlerde -8 gradýsqa deıin sýytady.
