Petropavlda Esil ózeni tasyp, sý halyqaralyq mańyzdaǵy tas jolǵa jetti
PETROPAVL. QazAqparat – Petropavlda Esil ózeniniń sý deńgeıi kúnnen-kúnge kóterilip, qaýipti belgige jaqyndap qaldy, dep habarlaıdy QazAqparat tilshisi.
«Qazgıdromet» RMK SQOF Petropavlda Esil ózeni sý deńgeıiniń kóterilýine baılanysty eskertý jarııalady. Mamandardyń aıtýynsha, búgin keshki saǵat 19.30 shamasynda sý deńgeıi 971 sm jetti. Saldarynan jaıylǵan sý «Chelıabi-Novosibir» baǵytyndaǵy halyqaralyq mańyzdaǵy tas joldyń ústine shyqty.
«Birer kún buryn qalalyq saıajaıǵa baratyn joldy sý basty. Petropavlda ózen deńgeıi kóterilip keledi. Qazir sý Novonıkolsk eldi mekeni janynda, deńgeıi 1431 sm jetti, bizdiń esebimiz boıynsha munda 1500 sm deıin kóteriledi. Bul byltyrǵydan kóp. Ótken jyly 1353 sm deıin kóterilgen bolatyn», - deıdi «Qazgıdromet» RMK SQOF dırektory Qymbat Merǵalımova.
Petropavlda Esil ózeniniń qaýipti belgisi - 1004 sm. Osy kórsetkishke jetkende jaıylǵan sý Zarechnyı kentine kiredi. Al sý deńgeıi 1050 sm jetkende Zarechnyıdan basqa Teplıchnoe kentine, Prıbrejnoe eldi mekenine aparatyn joldardy sý baspaq.
«Petropavl qalasynda kóktemgi sý tasqynynyń sharyqtaý shegi 20-21 sáýirge kútilýde. Qymbat Merǵalımovanyń aıtýynsha, byltyrǵy maksımaldy kórsetkish 1029 sm bolsa, bıyl 1070-1090 sm deıin kóterilýi múmkin», - deıdi Qymbat Merǵalımova.
