Petropavlda erteńnen bastap avtobýstar júre bastaıdy
Bul týraly Soltústik Qazaqstan oblysynyń ákimi Qumar Aqsaqalov Petropavldaǵy birqatar nysandardy aralaý barysynda aıtty. Óńir basshysynyń aıtýynsha, shahardaǵy barlyq qoǵamdyq kóliktiń jumysy qalpyna keledi.
«Bir apta boıy jaǵdaıdy baqylaýda ustaımyz. Eger de ınfektsııa juqtyrýdyń jańa derekteri anyqtalmasa, karantın shekteýlerin azdap bosańsytamyz. Budan basqa saıajaıǵa baratyn avtobýstar ádettegi jumys kestesine kóshedi. ıAǵnı turǵyndar jolaqysyn ózderi tóleıdi. Bir apta buryn qalalyqtarǵa saıajaıǵa barýǵa ruqsat berip, avtobýs parkterine arnaıy aqsha bóldik. Mundaı kómeksiz tasymaldaýshy kompanııalardyń jaǵdaıy qıyn bolar edi. Qazir olardyń barlyǵyna jumys isteýge múmkindik beremiz», - dedi Qumar Aqsaqalov.
Qoǵamdyq kóliktiń júrýine ruqsat berilgenimen, turǵyndar saqtyq sharalaryn esten shyǵarmaýy tıis.
«Avtobýstar tolyq bolmaýy kerek, jolaýshylar tek otyryp qana júre alady. Mindetti túrde salonda sanıtaızer, al turǵyndarda maska bolýy kerek. Eger de tekseris kezinde maskasyz júrgen jolaýshy anyqtalsa, avtobýs júrgizýshisi jazaǵa tartylady. Sol sebepti turǵyndardyń barlyǵyn qaýipsizdik sharalaryna túsinistikpen qaraýǵa shaqyramyn», - dedi oblys ákimi.