Petropavlda erli-zaıyptyny tonaǵandar ustaldy
PETROPAVL. QazAqparat - Petropavldyq polıtseıler erli-zaıyptyny tonaǵan kúdiktilerdi alysqa uzatpaı ustady, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń habarlaýynsha, belgisiz bireýler túnde kóshede kele jatqan erli-zaıyptyǵa shabýyldap, qoldaǵy sómkelerin julyp áketken. Zardap shekkender qylmyskerlerdiń túrin qarap úlgermegen. Sómke kóp uzamaı tabyldy, biraq ishindegi 25 myń teńge qoldy bolypty. Tártip saqshylary jedel-izdestirý sharalary barysynda Petropavl qalasynyń 20 jastaǵy turǵynyn ustady. Jas jigit buryn urlyq jasaǵany úshin sottalǵan bolyp shyqty.
Kúdiktiniń aıtýynsha, serigimen birge qydyrýǵa shyqqan. Kóshede kele jatqan áıel men er adamdy kórip, sómkelerin tartyp almaq bolǵan. Ala qashyp, aýlalardyń birinde sómke ishindegi aqshany alǵan.
«Petropavl qalasynyń polıtsııa basqarmasyna qala turǵyny Mır kóshesiniń boıynda belgisiz bireýlerdiń tonap ketkeni jóninde aryzdandy. Oblys ortalyǵynyń eki turǵynyn ustadyq. Olardyń bireýi urlyq jasaǵany úshin buryn isti bolypty. Qazirgi ýaqytta olardyń basqa da osyndaı qylmystarǵa qatysy bar-joqtyǵy anyqtalyp jatyr», - deıdi Petropavl qalalyq PB krımınaldy polıtsııa bólimshesiniń bastyǵy Erbolat Qaptaev.
Tártip saqshysynyń sózinshe, qylmystyń bul túrine 4 jylǵa deıin bas bostandyǵynan aıyrý jazasy berilýi múmkin. Jalpy, jyl basynan beri oblys ortalyǵynda 16 tonaý deregi tirkelse, onyń 9-y qoǵamdyq oryndarda bolǵan jáne 11 jaǵdaıda áıelderge shabýyl jasalǵan. Qylmyskerler uıaly telefon men aqshaǵa qyzyǵady eken. Al, tez arada polıtsııaǵa habar berý qylmystyń ashylý múmkindigin kóbeıtedi.
