Petropavlda erigen qar sýy basýy múmkin shaǵyn aýdandarda jedel shtabtar quryldy
PETROPAVL. KAZINFORM – Petropavlda sý basý qaýpi týyndaǵan jaǵdaıda jedel áreket etý úshin Jumysshy kenti men Birlik shaǵyn aýdanynda jedel shtabtar quryldy.
Soltústik Qazaqstan oblysy ákimdiginiń málimetine súıensek, bul shaǵyn aýdandarda erigen qar sýy turǵyndarǵa qaýip tóndirýi múmkin. Qazirgi ýaqytta tıisti qyzmetter kúsheıtilgen rejımde jumys istep jatyr.
– Qystan beri qar shyǵarý, káriz júıeleri men aryqtardy tazalaý jumystary qarqyndy júrgizilip keledi. Búgingi kúnge deıin oblys ortalyǵynan shamamen 900 myń tekshe metr qar shyǵaryldy. Qazirgi ýaqytta jumysqa 200-ge jýyq arnaıy tehnıka, 100-den astam motopompa, 30 assenızatorlyq tehnıka jáne 350-den astam adam, onyń ishinde eriktiler, áskerı qyzmetshiler men kommýnaldyq qyzmet mamandary jumyldyrylǵan, – dedi oblys ákimi Ǵaýez Nurmuhambetov.
Jumysshy kenti men Birlik shaǵyn aýdanyndaǵy sý tasqynyna qarsy qurylǵan shtabtar táýlik boıy jumys istep jatyr. Barlyq qyzmetter qaýipti ýchaskelerde erigen qar sýynyń jeke turǵyn úıler aýmaǵyna kirip, sý basý qaýpin azaıtýǵa baǵyttalǵan sharalardy atqarady. Negizgi maqsat – kóktemgi sý tasqyny kezinde jeke turǵyn úılerdi sý basýyna jol bermeý jáne turǵyndardyń qaýipsizdigin qamtamasyz etý.
Aıta keteıik, buǵan deıin SQO-da kúnniń jylynýyna baılanysty tasqyn qaýpi bar ózen-kólderge, aýmaqtarǵa aerovızýaldy monıtorıng júrgizilgenin jazǵan edik.
