Petropavlda er adamnyń denesi tabyldy
PETROPAVL. QazAqparat - Petropavlda polıtsııa qalanyń ortalyǵynan denesi tabylǵan er adamnyń óliminiń jaı-japsaryn tekserip jatyr, dep habarlaıdy QazAqparat tilshisi.
Múrde erte tańda Chaıkovskıı kóshesinde ornalasqan 13-A úıdiń mańynan tabylǵan. Beıresmı málimetke qaraǵanda, ol úıdiń joǵarǵy qabatynan qulap ketken bolýy kerek. Soltústik Qazaqstan oblysy polıtsııa departamentiniń baspasóz qyzmeti oqıǵanyń egjeı-tegjeıi tekserilip jatqanyn jetkizdi.
«Tańǵy 7 shamasynda «102» nómirine ulty eýropalyq belgisiz jas jigit habarlasyp, múrde jaıly habarlady. Qazir oqıǵa ornynda jedel tergeý toby jumys istep jatyr. Materıal sotqa deıingi tergep-tekserýlerdiń biryńǵaı tizilimine Qylmystyq kodekstiń «Densaýlyqqa qasaqana aýyr zaqym keltirý» babymen tirkeldi. Máıit sot-medıtsınalyq saraptamaǵa jiberildi», - dep málimdedi baspasóz qyzmetiniń ókilderi.
Eske sala keteıik, 8 naýryz kúni Petropavlda stýdent qyz qurylysy bitpegen ǵımarattan qulap, qaza tapqan bolatyn.
Avtor: Olesıa Jýkoven
