Petropavlda er adamnyń ústine benzın tógilip, tirideı janyp kete jazdady

PETROPAVL. KAZINFORM – Petropavldaǵy kópsalaly qalalyq jedel medıtsınalyq járdem aýrýhanasyna 30 jastaǵy er adam shuǵyl túrde aýyr kúıikpen jetkizildi.

Jubaıynyń aıtýynsha, jigit kanıstrden ot úrlegish lampaǵa benzın quıǵan. Sol sátte qolynda tutatylǵan temekisi bolǵan. Saldarynan ydys jarylyp, jigittiń kıimi lap etken. 

— Syrqat óte aýyr jaǵdaıda birden jansaqtaý bólimine jatqyzyldy. Onyń terisiniń 90% kúıgen, sonyń ishinde basyn, denesin, qol-aıaǵyn, tynys alý joldaryn kúıik shalǵan. ІІ-ІІІ deńgeıli kúıiktik shok alyp otyr. Qazirgi ýaqytta ol ókpeni jasandy jeldetý apparatyna qosylǵan, jaǵdaıy óte aýyr. Dárigerler bar qajetti emdi qoldanyp jatyr, — deıdi SQO Densaýlyq saqtaý basqarmasynyń baspasóz hatshysy Gúlnar Qalıeva.

SQO Polıtsııa departamenti er adamnyń abaısyzda kúıik alǵanyn rastady.

— 17 mamyrda Petropavlda termııalyq kúıik shalǵan 30 jastaǵy er adamdy aýrýhanaǵa jatqyzý faktisi boıynsha alǵashqy tekserý júrgizdi. Qala turǵynynyń benzındi ydystan ydysqa quıý kezinde qaýipsizdik sharasyn saqtamaǵany, saldarynan abaısyzda kúıik alǵany anyqtaldy. Qylmys belgileri joq, — dedi vedomstvonyń baspasóz qyzmetinde.

Buǵan deıin SQO-daǵy kolonııalardyń birinde jazasyn óteýshiler ózin jaraqattaǵanyn jazǵan edik.