Petropavlda er adamnan ınternet-alaıaqtar qoldanatyn qurylǵy tárkilendi
PETROPAVL. KAZINFORM — Petropavlda sim-bokstardy paıdalandy degen kúdikpen TMD elderiniń biriniń 32 jastaǵy azamaty ustaldy.
SQO Polıtsııa departamenti baspasóz qyzmetiniń málimetinshe, sim-bokstar jalǵan qujattar boıynsha jalǵa alynǵan páterlerde ornalastyrylǵan.
Mundaı sim-bokstardy paıdalana otyryp, ınternet-alaıaqtar «bankterdiń», «quqyq qorǵaý organdarynyń», «uıaly baılanys operatorlarynyń», «Qazposhtanyń» jáne basqa da uıymdardyń atyn jamylyp, óz qurbandaryna jalǵan nómirlerden qońyraý shala alady.
Tártip saqshylarynyń aıtýynsha, alaıaqtar óz áreketi arqyly úsh maqsatty ustanady:
Birinshisi — olar adamnan sms-habarlama arqyly kelgen kodty aıtýyn suraıdy. Muny múldem jasaýǵa bolmaıdy: kodty bilip alǵan qylmyskerler sizdiń shottaryńyzdy ıelenýi múmkin.
Ekinshisi — alaıaqtar adamdardy aldap, telefondaryna «AnyDesk», «TeamViewer», «HopToDesk», «AirDroidControl» jáne basqa da beıtanys qosymshalardy ornatýǵa kóndiredi. Bular alaıaqtarǵa uıaly telefondy qashyqtyqtan otyryp basqarýǵa múmkindik beretin qosymshalar. Eger telefonyńyz sizdiń komandalardy oryndamaı jatqanyn baıqasańyz, «ushaqta» rejımin qosýǵa tyrysyńyz, bul qashyqtyqtan basqarý seansyn toqtatady.
Úshinshisi — alaıaqtar kóp qoldanatyn tásil — adamdy iri nesıe alyp, «qaýipsiz» nemese «rezervtik» shotqa aqsha saldyrýǵa kóndirý. Esterińizde bolsyn: banktiń birde-bir qyzmetkeri adamdy qandaı da bir qarjylyq operatsııalardy oryndaýǵa kóndire almaıdy. Ózińizdi qorǵaý úshin Egov.mobile mobıldi qosymshasynda nesıelerden erikti túrde bas tartý qyzmetin paıdalanyńyz.
Qazirgi ýaqytta kúdikti qamaýǵa alynǵan. Polıtseıler onyń kıberqylmyskerlerdiń iri jelisiniń jumysyna qatysty bar-joǵyn tekserip jatyr.
Buǵan deıin SQO-da ınternet alaıaqtyqqa qatysty uıaly baılanys operatory aıyppul tólegenin jazǵan edik.