Petropavlda er adam geroınmen ustaldy
PETROPAVL. QazAqparat - Soltútikqazaqstandyq polıtseıler 9,45 gramm geroıni bar er adamdy ustady, dep habarlaıdy QazAqparat tilshisi.SQO ІІD baspasóz qyzmetiniń aqparatyna sáıkes, Petropavldyń 27 jastaǵy turǵyny qalanyń ortalyǵynda, Parkovaıa-Ýlıanov kósheleriniń qıylysynda ustalǵan.
Jedel qyzmetkerler toǵyz jarym gramm geroın orta eseppen 30 ret qabyldaýǵa jetetinin aıtady.
«Jigit Petropavl qalasy ishki ister departamentiniń ýaqytsha ustaý oqshaýlaǵyshyna jiberildi. QR QK 296-babynyń 4-bóligi boıynsha sotqa deıingi tergep-tekserý júrip jatyr. Osy bap boıynsha ol úsh jyldan jeti jylǵa deıin bas bostandyǵynan aıyrylýy múmkin», - deıdi vedomstvonyń baspasóz qyzmetindegiler.
Esirtki bıznesine qarsy kúres basqarmasy bastyǵynyń mindetin atqarýshy Dýlat Jaqyshevtiń aıtýynsha, jyl basynan beri oblysta zańsyz aınalymda júrgen 53 kılogramnan astam esirtki zattary tárkilengen, sonyń 220 gramnan astamy - geroın.
