Petropavlda er adam áskerı jasaqqa shabýyl jasaǵan
Soltústik Qazaqstan oblysy polıtsııa departamenti baspasóz qyzmetiniń málimetinshe, 18 sáýir saǵat 20.00 shamasynda patrýlderdiń biri Petropavldaǵy Ýlıanov kóshesinde mas júrginshini baıqaǵan. Er adam áskerı jasaqtyń medıtsınalyq kýálandyrýdan ótý usynysyna qarsylyq bildirip, ózin agressıvti ustaǵan. Araqtyń synǵan bótelkesimen ózine jaraqat keltirip, áskerı qyzmetshige judyryq ala umtylǵan.
Shabýyl jasaǵan er adam ustalyp, avtopatrýlge tapsyryldy. Atalǵan fakti «Bılik ókiline qatysty kúsh qoldaný» baby boıynsha Sotqa deıingi tergep-tekserýlerdiń biryńǵaı tizilimine engizildi. Kúdikti buryn adam ólimine ákep soqtyrǵan aýyr dene jaraqatyn keltirgeni jáne tonaǵany úshin buryn sottalǵan 29 jastaǵy Petropavl turǵyny bolyp shyqty. Medıtsınalyq kýálandyrý onyń mastyǵyn rastady.
«Kúdiktige qamaqqa alý túrindegi bultartpaý sharasy qoldanyldy. Baptyń sanktsııasy iri mólsherdegi aıyppuldan 3 jylǵa deıin bas bostandyǵynan aıyrý jazasyn kózdeıdi. Bıyl oblys ortalyǵynda bılik ókiline qatysty kúsh qoldanýdyń 2 deregi tirkeldi. Tájirıbe kórsetkendeı, mundaı jaǵdaı spırttik ishimdikti asyra paıdalanýmen baılanysty bolady», - deıdi Petropavl qalalyq polıtsııa basqarmasynyń bastyǵy Jandos Muqatov.
Petropavlda kún saıyn 151 áskerı qyzmetshi quqyqtyq tártipti saqtaýǵa kezekshilikke túsedi. Polıtsııanyń keshendi kúshteri quramynda olar qala kóshelerin patrýldeıdi, shaqyrtýlarǵa barady, baǵdarlarmen jumys isteıdi.