Petropavlda energetıkter kúninde jumysshylar baspanaly boldy
ASTANA. QazAqparat - Soltústik Qazaqstan oblysynyń ákimi Erik Sultanov «SEVKAZENERGO» AQ-nyń qyzmetkerlerine arnalǵan jataqhananyń ashylý saltanatyna qatysty. Joba «SEVKAZENERGO» AQ men Soltústik Qazaqstan ákimdigi arasyndaǵy memlekettik-jeke menshik áriptestik aıasynda júzege asty.
«Munda 90 páter bar. Men «SEVKAZENERGO» aktsıoneri «OAEK» kompanııasynyń áleýmettik jaýapkershiligin atap ótkim keledi. Týra bir jyl buryn qalamyzǵa 320 oryndyq jańa balabaqsha syılaǵan bolatyn. Bul úıde bir jáne eki bólmeli páterler bar», - dedi Erik Sultanov óz baıandamasynda.
Saltanatty taspa qııý rásiminen soń, oblys ákimi qonys ıeleriniń páterlerimen tanysyp, turǵyndarymen áńgimelesti, dep habarlaıdy ákimdiktiń baspasóz qyzmetinen.
Sondaı-aq, qýanysh ıelerin «Ortalyq Azııa Elektroenergetıkalyq Korporatsııa» AQ Prezıdenti Erkin Ámirhanov quttyqtady.
Aıta ketý kerek, mekeme jataqhanasynyń bolýy kásiporynǵa jas ári bilikti mamandardy tartýǵa múmkindik beredi. Budan bólek, 18 páterdi kompanııa Petropavl qalasynda kezekte turǵan otbasylarǵa beredi.
