Petropavlda elimizdegi alǵashqy ǵylymı-mádenı hab – «Maǵjan ortalyǵy» ashyldy
PETROPAVL. KAZINFORM – Petropavl qalasynda ult aqyny, oıshyl, aǵartýshy Maǵjan Jumabaevtyń esimin ıelengen elimizdegi alǵashqy ǵylymı-mádenı hab – «Maǵjan ortalyǵy» ashyldy. Bul týraly Úkimettiń baspasóz qyzmeti habarlady.
Jańa ortalyq tek tarıhı murany jańǵyrtý orny ǵana emes, ǵylymı zertteýler, mádenı-aǵartýshylyq baǵdarlamalar, halyqaralyq dıalogtar men shyǵarmashylyq jobalar júzege asatyn zamanaýı zııatkerlik keńistik bolmaq. Onyń ashylýy Soltústik Qazaqstan oblysyndaǵy mádenı jáne rýhanı serpilistiń aıqyn belgisine aınalyp, 11–17 tamyz aralyǵynda óńirde ótken halyqaralyq is-sharalar leginiń mańyzdy bóligi boldy.
Saltanatty rásimge Premer-mınıstrdiń orynbasary Ermek Kósherbaev, Ǵylym jáne joǵary bilim mınıstri Saıasat Nurbek, Mádenıet jáne aqparat mınıstrliginiń ókilderi, Túrki mádenıeti men murasyn saqtaý halyqaralyq uıymynyń basshylyǵy, óńir ákimi Ǵaýzez Nurmuhambetov, zııaly qaýym men qala turǵyndary qatysty.
— Tarıhı tulǵalardy ulyqtaý — bizdiń paryzymyz ǵana emes, ol — táýelsizdiktiń rýhanı tiregi, ulttyq sana-sezimniń berik irgetasy. Maǵjan Jumabaev sııaqty biregeı tulǵaǵa arnalǵan ortalyqtyń ashylýy — búkil el úshin mańyzdy oqıǵa. Maǵjan: «Men jastarǵa senemin» dedi. Búginde onyń «Batyr Baıan», «Qorqyt» poemalary, «Pedagogıka» oqýlyǵy jáne basqa da týyndylary jas urpaqty otansúıgishtikke, elge adaldyqqa, jaýapkershilikke tárbıeleýdi jalǵastyryp keledi. Bul ortalyq Maǵjan rýhyn jastarǵa jetkizip, olardy batyl oılaýǵa, abyroımen áreket etýge jáne týǵan jerge adal bolýǵa shabyttandyrady, — dedi Premer-mınıstrdiń orynbasary Ermek Kósherbaev.
«Maǵjan ortalyǵynyń» ishki keńistigi aqyn tulǵasynyń san qyryn jáne shyǵarmashylyq murasynyń aýqymyn aıqyn kórsetedi. Munda Maǵjan Jumabaevtyń jumys kabıneti turmystyq zattarymen birge qaıta jasaldy. Konferents-zal, zamanaýı kitaphana, muraǵat qujattaryn zertteý kabıneti, «Maǵjan» jýrnalynyń redaktsııasy jumys isteıdi. Intellıgentsııaǵa arnalǵan shyǵarmashylyq alań jáne «Maǵjantaný» ádebı klýby ashylyp, onda kezdesýler, pikirtalastar, taqyryptyq keshter ótetin bolady.
— Osyndaı ortalyqtyń ashylǵanyna shyn júrekten rızamyz. Bul — biz úshin ǵana emes, bolashaq urpaq úshin de asa mańyzdy. Uly tulǵalarǵa degen qurmet pen olardyń murasyn nasıhattaý — eldiń durys baǵytta kele jatqanynyń belgisi, — dedi aqynnyń týysy Dýlat Bekenev.
«Maǵjan ortalyǵy» XIX ǵasyrdyń sáýlet eskertkishi mártebesine ıe ǵımaratta ornalasqan. Ǵımaratqa keshendi restavratsııa júrgizilip, XIX ǵasyrdaǵy sırek kezdesetin alfreıli órnekter qalpyna keltirildi. Dızaınyn Sýretshiler odaǵynyń múshesi Bolat Áserbekov ázirledi, al jumystar Túrki mádenıeti men murasyn saqtaý qorynyń qoldaýymen atqaryldy.
Ortalyq janynda jergilikti kásipkerler men túrkııalyq metsenattyń bastamasymen «Maǵjan» art-kompozıtsııasy bar zamanaýı skver salynǵan.
— Biz, soltústikqazaqstandyqtar úshin, Maǵjan — tek ulttyq qazyna ǵana emes, bizdiń óńirdiń maqtanyshy. Onyń esimi Qazaqstanda ǵana emes, Ázerbaıjan, Ózbekstan, Qyrǵyzstanda, ásirese Túrkııada erekshe qurmetke ıe. «Maǵjan ortalyǵy» tek jergilikti turǵyndardyń emes, elimizdiń túkpir-túkpirinen jáne shetelden keletin qonaqtardyń da súıikti ornyna aınalady dep senemin, — dedi oblys ákimi Ǵaýez Nurmuhambetov.
Ortalyqtyń ashylýy uly aqynǵa degen qurmet, sonymen qatar eldiń mádenı biregeıligin nyǵaıtý, týrızmdi damytý men Qazaqstandy halyqaralyq arenada rýhanı-mádenı mura ortalyǵy retinde ilgeriletý jónindegi memlekettik saıasatty júzege asyrýdaǵy mańyzdy qadam bolyp otyr.
Aıta ketelik Oljas Bektenov Qyrǵyzstanmen shekaradaǵy ótkizý pýnktterin jańǵyrtý barysymen tanysty.