Petropavlda ekologtar zańsyz jumys jasaǵan zaýytty japqyzdy
PETROPAVL. QazAqparat - Petropavlda sottyń sheshimimen beton jasaıtyn zaýyt jabyldy, dep habarlaıdy QazAqparat tilshisi.
Soltústikkaqazaqstandyq ekologtar birneshe kópqabatty úılerdiń turǵyndarynyń ómirine kedergi keltirgen zaýytty japqyzdy.
Tsementtiń shańy men úzdiksiz shý Petropavldyń turǵyndaryna 2015 jyldan beri kedergi keltirip júrgen. Olar Soltústik Qazaqstan oblysy boıynsha ekologııa departamentine aryzdanǵan. Sol kezde zaýyt ruqsatsyz jumys istep turǵany belgili boldy. Sot kásiporynnyń qyzmetin dereý toqtatty. Alaıda biraz ýaqyt ótken soń zaýyt barlyq qujattardy alyp, qaıtadan jumys isteı bastady.
Aldyńǵy jyldyń qarasha aıynda ekologııa departamentine turǵyndardan taǵy da aryz túsken.
«Onyń negizinde biz jospardan tys tekseris ótkizdik. Ruqsat qujattar boıynsha sanıtarlyq qorǵaý aýmaǵy 45 metr bolýy kerek. Bizdiń mamandar zaýyttan eń jaqyn ornalasqan turǵyn úıge deıingi aýmaqty ólshegende 31 metr boldy», - dedi ekologııa departamenti basshysynyń orynbasary Azamat Bektasov.
Ekologtyń aıtýynsha, atalmysh zańsyzdyq úshin ákimshilik quqyzbuzýshylyq jónindegi QR QK-niń 332-baby negizinde kásiporynǵa aıyppul salyndy. Departament ruqsat qujattaryn qaıtaryp alý úshin sotqa shaǵym berdi.
Jyldyń basynda Soltústik Qazaqstan oblystyq mamandandyrylǵan aýdanaralyq ekonomıkalyq sot ekologııa departamentiniń suranysyn qanaǵattandyrdy.
«Dál qazir kásiporynnyń qolynda ruqsat ta, sheshim de joq. Olardyń jumys jasaýǵa quqyqtary joq», - dedi A.Bektasov.
