Petropavlda eko-parktiń qurylysy bastaldy
PETROPAVL. KAZINFORM – Petropavlda aýmaǵy 41 gektarǵa shaqtalǵan ekologııalyq jáne trıatlon baqtyń qurylysy júrip jatyr.
Soltústik Qazaqstan oblystyq ákimdiginiń málimetinshe, aýqymdy joba Petropavl mańyndaǵy Pestroe kóliniń janynda júzege asady. Demalys aımaǵy 2028 jyly paıdalanýǵa beriledi dep josparlanǵan. Nátıjesinde jyl boıy demalýǵa, mádenı is-sharalar ótkizýge arnalǵan zamanaýı baq paıda bolady.
– «Qyzyljar» eko-parkin iske qosý aıasynda aýmaqty abattandyrý, jaryqtandyrý júıesin ornatý, shaǵyn sáýlettik nysandardy ornalastyrý, ınjenerlik ınfraqurylymdy damytý jáne avtoturaq aımaqtaryn uıymdastyrý qarastyrylǵan. Sonymen birge Teplıchnoe aýyly arqyly parkke aparatyn kirme joldy keńeıtý jáne 520 oryndyq avtoturaq salý jobasy ázirlenip jatyr, - dedi oblys ákimi Ǵaýez Nurmuhambetov.
Іri ınfraqurylymdyq jobalardyń biri Petropavldaǵy basty kóshelerdiń biri – Qazaqstan Konstıtýtsııasy kóshesimen baılanysty. Bıyl munda jańǵyrtýdyń ekinshi kezeńi bastaldy. Jóndeý jumystary Park kóshesinen N.Nazarbaev kóshesine deıingi aralyqty qamtıdy.
Joba aıasynda tas tósemi tolyq aýystyrylyp, jaryqtandyrý júıesi jańartylady. Sonymen qatar kósheniń sáýlettik kelbeti keshendi túrde jańǵyrtylyp, turǵyn úıler men kásipkerlik nysandarynyń qasbetteri retke keltiriledi. Budan bólek sýburqaqtardy jóndeý jáne abattandyrý elementterin ornatý josparlanǵan.
Buǵan deıin Túrkistan oblysynda Saryaǵash aınalma jolynyń qurylysy bastalǵanyn jazǵan edik.