Petropavlda Ekibastuzdan kelgen qalta urysy ustaldy
PETROPAVL. QazAqparat -Ekibastuz qalasynan týystaryna qonaqqa kelip, jergilikti jurttyń qaltasyn qaqqan ury ustaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, «gastrolshi» qalta urysynyń jasy 42-de. Ustalǵan kúdikti áıeldiń urlaý sátin «Ot ı do» saýda úıindegi aıaq-kıim bólimindegi beınebaqylaý kamerasy tirkegen. Satyp alýshylardyń biriniń sómkesiniń ashyq turǵanyn baıqaǵan ury ámııandy qaǵyp ketipti. Qarajatynyń qoldy bolǵanyn qala turǵyny alǵan aıaq-kıiminiń aqshasyn tólemekshi bolyp kassaǵa kelgen kezde ǵana baıqaǵan. Osyǵan uqsas urlyqtar ózge eki saýda úıinde de anyqtaldy.
Jedel is-shara barysynda Petropavl polıtseıleri kúdikti týraly málimetterdi anyqtady, ony kórshi oblystardyń polıtseıleri de izdestirýde eken. Ózge óńirlerde de qalta urlyǵymen aınalysqan áıeldi tártip saqshylary Jumysshy kentinde týysynyń úıinde qonaqta otyrǵan sátinde ustady. Ol urlanǵan aqshany qaıtardy.
Urlyq faktisine qatysty QR Qylmystyq kodeksiniń 188-babynyń 1-bólimi boıynsha tergeý júrgizilýde. Polıtseıler turǵyndardy, ásirese halyq kóp jınalatyn jerlerde saq bolýdy eskertedi. Qalta urylarynan zardap shekpes úshin sómkeni únemi baqylaýda ustap, ámııandardy, uıaly telefondar men basqa da qundy zattardy urylardyń qoly jetpeıtin jerde saqtaǵan jón.
