Petropavlda eki jyl buryn jóndelgen kópir qaıta qırap jatyr

PETROPAVL. QazAqparat – Petropavl men Jumysshy kentin qosatyn avtomobıl kópirine qaıta jóndeý qajet. Eki jyl buryn ortasha jóndeýden ótken nysanda qaıtadan jaryqtar paıda bolyp, asfalti oıylyp qalǵan, dep habarlaıdy QazAqparat tilshisi.

Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi baspasóz qyzmetiniń málimetinshe, Jumysshy kentine baratyn ótpejoldyń salynǵanyna 62 jyl, 125 metrge sozylyp jatyr.

2014 jyly nysanda jańǵyrtý jumysy júrgizildi.

Eki jyl buryn qaıtadan ortasha jóndeýden ótti. Jumys barysynda asfalt tósemesi aýystyrylyp, qurylystyń jalǵanǵan jerleri jez kompensatormen bekitildi.

Endi mine kentti Petropavlmen qosatyn avtomobıl kópiri qaıtadan oıdym-oıdym bolyp, kólikterdiń ótýin qıyndatyp otyr.

Qurylystyń qosylǵan jerleri ashylyp ketip, asfalt tesilip qalǵan.

«Turǵyn úı-kommýnaldyq sharýashylyǵy bólimi jolótpesin tehnıkalyq tekseristen ótkizetin kompanııany anyqtaý úshin memlekettik satyp alýǵa konkýrs jarııalaıdy. Mamandar onyń parametrlerin, búlingen jerlerin anyqtaıdy. Zertteý qorytyndysy boıynsha jolótpesin jóndeýden ótkizýge qatysty sheshim qabyldanady. Al ázirge kepildik mindettemesi aıasynda merdiger kompanııa ýchaskege jóndeý júrgizedi», - deıdi bólimniń baspasóz hatshysy Janel Batanova.

Qazirgi ýaqytta Ýnıversalnaıa kóshesi boıynda «Reseı temir joly» AAQ temirjoldarynyń ústinen jol ótkelin salý jobasy boıynsha memlekettik satyp alý sharty jasaldy.

«Merdiger kompanııa jumysqa kiristi. Jańa avtojol ótkeliniń qurylysy Karavannaıa kóshesindegi jolótpesine túsken salmaqty jáne kólik aǵynyn azaıtady. Joba aıasynda Ýnıversalnaıa jáne O. Koshevoı kósheleri jóndelip, osy aýdan abattandyrylady», - deıdi Janel Batanova.

Esterińizge sala keteıik, 2021-shi jyly bul nysandy jónge keltirýge 21 mln teńge jumsalǵan edi.