Petropavlda eki jigit bir túnde tórt kólikti tonaǵan
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda 18 jáne 28 jastaǵy eki jigitke qatysty shyǵarylǵan úkim kúshine endi. Jastar kólikti tonaýǵa qatysty 5 epızod boıynsha qylmystyq jaýapkershilikke tartyldy.
«Qylmyskerler túnde áreket etken. Negizinen ıeleri esikterin jabýǵa umytyp ketken avtokólikterdiń ishine enip otyrǵan. Eki jaǵdaıda mashınalardyń terezesin syndyryp, ishke engen. Olar kólik salonynda, júksalǵyshtarda qaldyrylǵan zattardy alyp ketip otyrǵan.
Toqsan bı kóshesindegi úılerdiń biriniń aýlasynda qańtarylyp turǵan «BMW» avtokóliginen qaskóıler 12 myń teńge salynǵan ámııandy, banktik kartalar men kólikti tirkeý kýáligin qoldy qylǵan», - deıdi Petropavl qalasy polıtsııa basqarmasy tergeý bóliminiń bastyǵy Nurjan Omarov.
Bes epızodtyń tórteýi tamyzdyń 31-ne qaraǵan túni jasalǵan. Kólik urylarynyń alkogoldik mas kúıde bolǵany anyqtaldy.
«Qyrkúıek aıynyń basynda kúdiktiler ustalyp, qamaýǵa alyndy. Ekeýi de buryn sottalǵan. Kishisi buǵan deıin kámelet jasyna jetpeı turyp, qylmystyq áreketterge barǵan. Sot oǵan 3 jylǵa bas bostandyǵynan aıyrý túrindegi, al janyndaǵy syıbaılasyna 4 jylǵa bos bostandyǵyn shekteý túrindegi jaza taǵaıyndady.
Avtokólik ıelerine salonda qundy zattar men qujattardy, aqshany qaldyrmaýǵa keńes beremiz. Avtokólikke múmkindiginshe dabyl qurylǵysyn ornatqan jón. Eger kúzetiletin kólik turaǵy bolmasa, mashınany túngi ýaqytta jaryq túsip turatyn jerge qoıǵan durys. Sondaı-aq kóppáterli úılerdiń aýlalarynda beınebaqylaý kameralaryn ornatýdyń da tıimdiligi bar. Olar avtokólikterde jasalǵan urlyqtardy «izin sýytpaı» ashýǵa kómektesedi. Ári bul jerge urylar da bettemeıdi», - deıdi Nurjan Omarov.
