Petropavlda eki stýdent qyzdy kólik qaǵyp ketti
PETROPAVL. QazAqparat – Petropavlda ótken demalys kúnderi eki stýdent qyzdy kólik qaǵyp, sonyń saldarynan ekeýi de dene jaraqatyn aldy, dep habarlaıdy QazAqparat tilshisi.
Soltústik Qazaqstan oblysynyń polıtseıleri kólik júrgizýshilerdi de, jaıaý júrginshilerdi de jolda abaı bolýǵa shaqyrady. Qys mezgiliniń kelýine baılanysty jol jaǵdaıy nasharlap, kóktaıǵaq saldary jol-kólik apatyna ákelýi múmkin.
SQO Polıtsııa departamenti baspasóz qyzmetinen málim etkendeı, osyndaı oqıǵalardyń biri 23 qarasha kúni Petropavl qalasynda boldy. Keshki saǵat 19.00-dar shamasynda N.Nazarbaev-Jýkov kósheleriniń qıylysynda joldan ótip bara jatqan oblys ortalyǵynyń 16 jastaǵy turǵynyn «VAZ» kóligi soǵyp ketti. Zardap shekken stýdent qyz dene jaraqatymen aýrýhanaǵa jetkizildi. Jol oqıǵasyna qatysty sotqa deıingi tergeý bastaldy.
Endi bir jol apaty 24 qarasha kúni bolǵan. Potanın kóshesinen ótip bara jatqan 17 jastaǵy qyzdy kólik soǵyp, dene jaraqatyn aldy.
«Aýa-raıyna baılanysty qyraǵylyqty eki ese arttyrý kerek. Joldan tek arnaıy jaıaý júrginshi jolymen ótý qajet. Onda da kele jatqan avtokólik toqtap jol bergen jaǵdaıda jáne qaýipsiz ekendigine kóz jetkizgende ǵana ótýge bolady», - deıdi SQO PD Jergilikti polıtsııa qyzmeti basqarmasynyń basshysy Aıdyn Baımatov.
SQO-da joldaǵy óreskel ereje buzýshylyqty anyqtaý maqsatynda uıymdastyrylǵan «Qaýipsiz jol» jedel-profılaktıkalyq is-sharasy aıaqtaldy. Tártip saqshylarynyń sózine qaraǵanda, jol-kólik oqıǵalarynyń týyndaýyna kóp jaǵdaıda qolaısyz aýa-raıy sebep bolady eken.
