Petropavlda eki mototsıklshiniń jaraqattanýyna sebepshi bolǵan kólik júrgizýshisi ustaldy
PETROPAVL. QazAqparat – Petropavlda jol-kólik oqıǵasyna sebepshi bolyp, apat ornynan ketip qalǵan kólik júrgizýshisi anyqtalyp, ustaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 23 qyrkúıekte saǵat keshki 22.00 shamasynda Petropavldaǵy M.Jumabaev pen K.Sútishev kósheleriniń qıylysynda eki mototsıklshi jaraqat alǵan jol-kólik oqıǵasy tirkeldi. Tártip saqshylary mán-jaıdy anyqtady. Belgili bolǵany, sheteldik kólik júrgizýshisi solǵa burylǵanda eki mototsıklshige jol bermegen, soqtyǵysýdy boldyrmaýdyń nátıjesinde baıkerler aýdarylǵan. Olardyń ekeýi de jaraqat aldy, birine medıtsınalyq kómek qajet boldy, keıin úıine jiberildi. Al kólik júrgizýshisi apat bolǵan jerden ketip qalǵan.
Jergilikti polıtsııa qyzmeti basqarmasy izdestirý tobynyń qyzmetkerleri izdestirý is-sharalaryn júrgizdi, nátıjesinde polıtseıler kóliktiń markasyn anyqtady. Oqys oqıǵa jedel basqarý ortalyǵynyń kameralaryna jazylyp qalypty. Sonymen qatar, polıtseıler sheteldik mashınany basqarǵan júrgizýshini anyqtaýǵa múmkindik beretin qosymsha jedel is -sharalar júrgizdi. Nátıjesinde 45 jastaǵy Volkswagen Touareg avtomashınasynyń júrgizýshisine qatysty QR ÁQBtK 610-baby, 1-bóligi jáne 611-baptyń 2-bóligi boıynsha ákimshilik materıal jınaldy.
«Bıyl izdestirý tobynyń qyzmetkerleri jol-kólik oqıǵasy kezinde adamdar zardap shekken, biraq oqıǵa ornynan qashyp ketken kináli 20 júrgizýshini anyqtap, ustady. Beınebaqylaý kameralary - bul jumystyń tıimdi bolýyna yqpal etetin qural ekendigin aıta ketý kerek. Jeke uıymdardyń ǵımarattarynda ornalasqan kameralardyń da qylmysty ashýda kómegi zor», - deıdi SQO PD jergilikti polıtsııa basqarmasynyń bastyǵy Aıdyn Baımatov.
